മലപ്പുറം: ബജറ്റ് സമ്മേളനത്തിൽ പോലും പങ്കെടുക്കാതെ പിവി അൻവർ എംഎൽഎ ആഫ്രിക്കയിൽ നടത്തുന്ന ബിസിനസ് എന്താണെന്ന് സിപിഎം നേതൃത്വം വെളിപ്പെടുത്തണമെന്ന് നിലമ്പൂർ മണ്ഡലം യൂത്ത് കോൺഗ്രസ് നേതാക്കൾ ആവശ്യപ്പെട്ടു. അൻവറിന്റെ വിദേശ യാത്രകളും പണമിടപാടുകളും അന്വേഷിക്കണമെന്നും യൂത്ത് കോൺഗ്രസ് നേതാക്കൾ വാർത്താ സമ്മേളനത്തിൽ പറഞ്ഞു.
വിദേശത്തേക്ക് കച്ചവട ആവശ്യത്തിന് പോയ എംഎൽഎയെ ഒരുമാസത്തിൽ അധികമായി മണ്ഡലത്തിൽ കാണുന്നില്ല. ആഫ്രിക്കയിൽ അദ്ദേഹം നടത്തുന്ന ബിസിനസ് എന്താണെന്ന് ജനങ്ങളോടു പറയാനുള്ള ബാധ്യത സിപിഎമ്മിന് ഉണ്ട്. രണ്ട് പ്രളയങ്ങൾ ഏറ്റുവാങ്ങിയ നിലമ്പൂരിലേക്കു ഒരു സ്‌പെഷ്യൽ പാക്കേജ് പോലും കൊണ്ടുവരാൻ സാധിക്കാത്ത എംഎൽഎ, കവളപ്പാറ ഉരുൾപൊട്ടൽ ദുരന്തത്തിന്റെ പേരിൽ ഭൂമിക്കച്ചവടം നടത്താനാണ് ശ്രമിച്ചത്. അൻവറിന്റെ കള്ളക്കച്ചവടം അവസാനിപ്പിക്കാൻ സിപിഎം നേതൃത്വം തയ്യാറാകണമെന്നും യൂത്ത് കോൺഗ്രസ് പറഞ്ഞു
യൂത്ത് കോൺഗ്രസ് ഭാരവാഹികളായ ജൂഡി തോമസ്, മൂർഖൻ ഷംസുദ്ദീൻ, റിഫാൻ വഴിക്കടവ്, കെപി അമീർ എന്നിവർ വാർത്താ സമ്മേളനത്തിൽ പങ്കെടുത്തു.
Malabar News: ബിജെപിയെ ജയിപ്പിക്കാൻ സിപിഎം രഹസ്യ ധാരണ; ആരോപണവുമായി കെപിഎ മജീദ്
