റിയാദ്: കോവിഡ് കാലത്തെ സേവന മികവിന് ആരോഗ്യപ്രവർത്തകർക്ക് ആദരമർപ്പിച്ച് സൗദി ആരോഗ്യ മന്ത്രാലയം. തിരഞ്ഞെടുക്കപ്പെട്ട 20 ആരോഗ്യപ്രവർത്തകരെയാണ് ആദരിച്ചത്. നഴ്സിംഗ് വിഭാഗത്തിൽ ബഹുമതി ലഭിച്ചവരിൽ ഒരു മലയാളിയും ഉൾപ്പെടുന്നു. കണ്ണൂർ സ്വദേശി ഷീബ എബ്രഹാമിനാണ് ബഹുമതി ലഭിച്ചത്.
ഗൾഫ് രാജ്യങ്ങളിൽ ഏറ്റവുമധികം കോവിഡ് വ്യാപനമുണ്ടായ രാജ്യമായിരുന്നു സൗദി അറേബ്യ. കോവിഡ് രോഗികളോടുള്ള സമീപനവും സേവന മികവും കണക്കിലെടുത്താണ് ഷീബയെ ബഹുമതിക്ക് തിരഞ്ഞെടുത്തത്. 14 വർഷമായി ജിസാനിലെ അബു അരീഷ് ആശുപത്രിയിലെ സ്റ്റാഫ് നഴ്സ് ആണ് ഷീബ. അഞ്ച് മാസമായി കോവിഡ് വിഭാഗത്തിൽ സേവനമനുഷ്ഠിക്കുന്നു. കോവിഡ് ചികിത്സ നേടിയവരിൽ നടത്തിയ സർവേയിലൂടെയാണ് ഷീബയുൾപ്പെടെ 20 ആരോഗ്യപ്രവർത്തകരെ തിരഞ്ഞെടുത്തത്.