തിരുവനന്തപുരം: സംസ്‌ഥാന തിരഞ്ഞെടുപ്പ് കമ്മീഷന്റെ പോസ്‌റ്ററുകളിൽ ഇ ശ്രീധരന്റെ ചിത്രം പാടില്ലെന്ന് മുഖ്യ തിരഞ്ഞെടുപ്പ് കമ്മീഷണർ നിർദ്ദേശിച്ചു. ഇ ശ്രീധരൻ ബിജെപിയിൽ ചേർന്നതിന് പിന്നാലെയാണ് തിരഞ്ഞെടുപ്പ് കമ്മീഷന്റെ നടപടി.
2019ലെ ലോക്‌സഭാ തിരഞ്ഞെടുപ്പിൽ തിരഞ്ഞെടുപ്പ് കമ്മീഷന്റെ ഐക്കണായിരുന്നു ഇ ശ്രീധരൻ. ശ്രീധരനോടൊപ്പം കെഎസ് ചിത്രയെയും തിരഞ്ഞെടുപ്പ് കമ്മീഷൻ ഐക്കണായി പ്രഖ്യാപിച്ചിരുന്നു. നിയമസഭാ തിരഞ്ഞെടുപ്പിലും ഇരുവരെയും ഐക്കണായി മുന്നോട്ട് കൊണ്ടുപോകാനായിരുന്നു തിരഞ്ഞെടുപ്പ് കമ്മീഷന്റെ തീരുമാനം. കമ്മീഷൻ പുറത്തിറക്കിയ പോസ്‌റ്ററുകളിലും ചിത്രയുടെയും ശ്രീധരന്റെയും ചിത്രം ഉണ്ടായിരുന്നു.
എന്നാൽ ബിജെപി അംഗത്വം സ്വീകരിച്ചതോടെ ഇ ശ്രീധരന് നിഷ്‌പക്ഷത ഇല്ലാതായി. അതിനാലാണ് അദ്ദേഹത്തിന്റെ ചിത്രം പോസ്‌റ്ററുകളിൽ നിന്ന് നീക്കണമെന്ന് മുഖ്യതിരഞ്ഞെടുപ്പ് കമ്മീഷണർ നിർദ്ദേശിച്ചത്. ഇക്കാര്യം കമ്മീഷണർ കത്തിലൂടെ ജില്ലാ വരണാധികാരികളെ അറിയിച്ചു. ശ്രീധരൻ ഒരു രാഷ്‌ട്രീയ പാർട്ടിയിൽ ചേർന്നതിന് പിന്നാലെയുള്ള സ്വാഭാവിക നടപടിയെന്നാണ് തിരഞ്ഞെടുപ്പ് കമ്മീഷന്റെ പ്രതികരണം.
Also Read: ശശീന്ദ്രനെതിരെ എൻസിപിയിൽ പടയൊരുക്കം; നേതാക്കൾ ഡെൽഹിയിലേക്ക്
