തിരുവനന്തപുരം: ബിജെപി കേന്ദ്ര നേതൃത്വവുമായി കൂടിക്കാഴ്‌ച നടത്തുന്നതിനായി സുരേഷ്‌ഗോപി എംപി നാളെ ഡെൽഹിയിലേക്ക്. ബിജെപി സംസ്‌ഥാന അധ്യക്ഷ സ്‌ഥാനത്തേക്ക് സുരേഷ് ഗോപിയുടെ പേര് നേതൃത്വം നിർദ്ദേശിച്ച സാഹചര്യത്തിലാണ് നേതൃത്വവുമായി കൂടിക്കാഴ്‌ചക്ക് അദ്ദേഹം ഒരുങ്ങുന്നത്. പ്രധാനമന്ത്രി നരേന്ദ്ര മോദിയുമായും, അമിത് ഷായുമായും സുരേഷ് ഗോപി കൂടിക്കാഴ്‌ച നടത്തി കാര്യങ്ങൾ ചർച്ച ചെയ്യും.
സംസ്‌ഥാനത്ത് പാർട്ടിയിലേക്ക് കൂടുതൽ പേരെ അടുപ്പിക്കാനും മറ്റും സുരേഷ് ഗോപിയുടെ ജനകീയ മുഖം ഗുണം ചെയ്യുമെന്നാണ് കേന്ദ്ര നേതൃത്വം കണക്കാക്കുന്നത്. കൂടാതെ സംസ്‌ഥാന അധ്യക്ഷ സ്‌ഥാനത്ത് നിന്നും കെ സുരേന്ദ്രനെ മാറ്റി ജനകീയ മുഖത്തെ കൊണ്ടുവരാനാണ് പാർട്ടി നേതൃത്വം ആലോചിക്കുന്നത്. അങ്ങനെയാണ് നേതൃത്വം ആദ്യ പരിഗണന സുരേഷ് ഗോപിക്ക് നൽകിയത്.
അതേസമയം നിലവിൽ പാർട്ടി പ്രവർത്തകനായി തന്നെ തുടരാനാണ് തനിക്ക് താൽപര്യമെന്നാണ് സുരേഷ് ഗോപി പ്രതികരിച്ചത്. ബിജെപി തനിക്ക് ചില ഉത്തരവാദിത്വങ്ങൾ നൽകിയിട്ടുണ്ട്. അത് ഭംഗിയായി നിറവേറ്റനാണ് താൻ ശ്രമിക്കുന്നതെന്നും അദ്ദേഹം അറിയിച്ചു. നിലവിൽ നിയമസഭാ തിരഞ്ഞെടുപ്പിലെ കനത്ത തോൽവിയും, കുഴപ്പണ കേസിലെ ആരോപണങ്ങളും പ്രതിസന്ധി രൂക്ഷമാക്കിയ സാഹചര്യത്തിൽ അടുത്ത ലോക്‌സഭാ തിരഞ്ഞെടുപ്പിന് മുമ്പ് പാർട്ടിയെ സജീവമാക്കുകയെന്ന വലിയ ഉത്തരവാദിത്വമാണ് അടുത്ത അധ്യക്ഷന് മുന്നിലുള്ളത്.
Read also: ഓൺലൈൻ വിവാഹ രജിസ്‌ട്രേഷൻ; മുഖ്യ രജിസ്ട്രാറുടെ പ്രത്യേക അനുമതി ആവശ്യമില്ല
