നല്ല എഴുത്തുകാരുടെ അഭാവമാണ് ഇന്ന് സിനിമ നേരിടുന്ന ഏറ്റവും വലിയ വെല്ലുവിളിയെന്ന് സംവിധായകന്‍ പ്രിയദര്‍ശന്‍. സിനിമ എന്നത് ഇന്ന് ഒരു കല മാത്രമല്ലെന്നും അതൊരു ബിസിനസ് കൂടിയാണെന്നും പ്രിയദര്‍ശന്‍ പറഞ്ഞു.
‘ആദ്യമൊക്കെ പറയുമായിരുന്നു സിനിമ എന്നത് ഒരു കലയാണെന്ന് എന്നാല്‍ ഇന്ന് സിനിമ എന്ന് പറയുന്നത് ബിസിനസ് കൂടിയാണ്. എനിക്ക് നാളത്തെ ജനറേഷനോട് പറയാനുള്ളത് കലയെന്നത് നിങ്ങളുടെ മനസില്‍ ഉണ്ടാകേണ്ടത് തന്നെയാണ്. പക്ഷേ ഇതൊരു ബിസിനസ് കൂടിയാണെന്ന കാര്യം മറക്കരുത്. ഇല്ലെങ്കില്‍ നിങ്ങള്‍ക്ക് അതീജീവിക്കാന്‍ പ്രയാസമായിരിക്കും’ പ്രിയദര്‍ശന്‍ പറയുന്നു.
എംടി സാറിനൊപ്പവും അമിതാഭ് ബച്ചനൊപ്പവും ഉള്ള സിനിമ മനസിലുണ്ടെന്നും വൈകാതെ അത് സംഭവിക്കുമെന്നാണ് പ്രതീക്ഷയെന്നും ‘രാഗം 21‘ന് നല്‍കിയ അഭിമുഖത്തില്‍ പ്രിയദര്‍ശന്‍ പറഞ്ഞു.
‘എന്റെ എല്ലാ സിനിമയും സംഭവിച്ചതാണ്. കൂടുതല്‍ പ്ളാനിങ് ഒന്നും ഉണ്ടായിരുന്നില്ല. ഒഴുക്കിനൊത്ത് പോകുന്ന ആളാണ് ഞാന്‍. 40 വര്‍ഷം എങ്ങനെയാണ് സര്‍വൈവ് ചെയ്‌തത് എന്നോര്‍ക്കുമ്പോള്‍ എനിക്ക് ഇപ്പോഴും അത്‌ഭുതം തോന്നും’ പ്രിയദർശൻ കൂട്ടിച്ചേർത്തു.
സിനിമയെ സംബന്ധിച്ച് ഭാഷ എന്നത് ഒരു തടസമേ അല്ല. ഹിന്ദിയില്‍ 31 സിനിമ താന്‍ എങ്ങനെ എടുത്തു എന്നത് തനിക്ക് തന്നെ അറിയില്ലെന്നും പ്രിയദര്‍ശന്‍ പറയുന്നു. ഒരു തവണ നമ്മള്‍ സക്‌സസ് ആയിക്കഴിഞ്ഞാല്‍ പിന്നെ നമ്മളെ തടഞ്ഞു നിര്‍ത്താന്‍ ആര്‍ക്കും സാധിക്കില്ലെന്നും പ്രിയദര്‍ശന്‍ അഭിമുഖത്തില്‍ പറഞ്ഞു.
Read Also: ദാദാസാഹേബ് ഫാൽക്കെ പുരസ്‌കാരം രജനികാന്തിന്
