ഹൈദരാബാദ്: തെലങ്കാന തലസ്‌ഥാനമായ ഹൈദരാബാദിലെ ഒസ്‌മാനിയ ജനറൽ ആശുപത്രിയിൽ ഡോക്‌ടറുടെ തലയിൽ ഫാൻ വീണു. ആശുപത്രിയിലെ സീലിംഗ് ഫാൻ വീണ് ത്വക്ക് രോഗ വിഭാഗത്തിലെ വനിതാ ഡ്യൂട്ടി ഡോക്‌ടറുടെ തലക്കാണ് പരിക്കേറ്റത്. സംഭവത്തിൽ വ്യത്യസ്‌ത പ്രതിഷേധവുമായി ആശുപത്രിയിലെ ജൂനിയർ ഡോക്‌ടർമാർ രംഗത്ത് വന്നു.
ഡ്യൂട്ടിക്കിടെ ഹെൽമറ്റ് ധരിച്ചാണ് ഡോക്‌ടർമാർ പ്രതിഷേധം രേഖപ്പെടുത്തിയത്. ഇത്തരം അപകടം ആവർത്തിക്കാതിരിക്കാൻ നടപടി വേണമെന്ന് ആശുപത്രി സൂപ്രണ്ടിനോട് ജൂനിയർ ഡോക്‌ടർമാരുടെ സംഘം ആവശ്യപ്പെട്ടു.
ജീവൻ അപകടത്തിലാക്കി പ്രവർത്തിക്കുന്നത് രോഗികളുടെ പരിചരണത്തിനും ചുമതലകൾ നിർവഹിക്കുന്നതിനും വേണ്ടിയാണ്. ജോലി ചെയ്യുന്നതിൽ തടസമാകുമെന്നതിനാൽ ഇക്കാര്യം പരിശോധിക്കണമെന്നും ഡോക്‌ടർമാർ അഭ്യർഥിച്ചു.
“ഇത്തരം അപകടം ആശുപത്രിയിൽ സ്‌ഥിര സംഭവങ്ങളായി മാറിയിരിക്കുന്നു. ഇതുവരെ ജീവനക്കാർക്കോ രോഗികൾക്കോ ഗുരുതരമായ പരിക്കുകൾ സംഭവിക്കാത്തത് ഭാഗ്യം കൊണ്ടാണ്. വീണ്ടും അപകടങ്ങൾ ആവർത്തിച്ചാൽ അധികാരികൾ ഉത്തരം പറയേണ്ടിവരും,”- സൂപ്രണ്ടിന് സമർപ്പിച്ച മെമ്മോറാണ്ടത്തിൽ ഡോക്‌ടർമാർ പറഞ്ഞു.
Most Read: പെഗാസസ്; അന്വേഷണത്തിന് വിദഗ്‌ധ സമിതിയെ നിയോഗിച്ച് സുപ്രീം കോടതി
