പാലക്കാട്: വാണിയംകുളത്തെ പെട്രോൾ പമ്പിൽ നിന്ന് 30,350 രൂപ കവർന്നു. പാലക്കാട്-കുളപ്പുള്ളി പാതയോരത്തെ മയിൽ വാഹനം ഗ്രുപ്പിന്റെ ഉടമസ്‌ഥതയിലുള്ള പെട്രോൾ പമ്പിലാണ് മോഷണം നടന്നത്. ഇവിടെ ഓഫീസിനുള്ളിലെ മേശയിൽ സൂക്ഷിച്ചിരുന്ന പണമാണ് കവർന്നത്.
ഓഫീസിന്റെ വാതിൽ കുത്തിപൊളിച്ചാണ് മോഷ്‌ടാക്കൾ അകത്ത് കയറിയത്. പണം അടങ്ങിയ മേശയുടെ പൂട്ടും പൊളിച്ചിട്ട നിലയിലായിരുന്നു. പമ്പ് മാനേജർ പി ജയരാജും മറ്റ് ജീവനക്കാരും ഇന്നലെ രാവിലെ പമ്പ് തുറക്കാൻ എത്തിയപ്പോഴാണ് മോഷണ വിവരം അറിയുന്നത്. ഇവിടെയുള്ള നിരീക്ഷണ ക്യാമറകളുടെ ചില സാമഗ്രികളും മോഷണം പോയിട്ടുണ്ട്. സംഭവത്തിൽ പമ്പ് മാനേജർ ഒറ്റപ്പാലം പോലീസിൽ പരാതി നൽകി. പരാതിയുടെ അടിസ്‌ഥാനത്തിൽ ഡോഗ് സ്‌ക്വാഡും വിരലടയാള വിദഗ്‌ധരും പമ്പിലെത്തി തെളിവെടുപ്പ് നടത്തി. സംഭവത്തിൽ വിശദമായ അന്വേഷണം നടത്തുമെന്ന് പോലീസ് പറഞ്ഞു.
Read Also: കൊടകര കള്ളപ്പണ കേസ്; ഇഡി അന്വേഷണം ആവശ്യപ്പെട്ടുള്ള ഹരജി ഇന്ന് ഹൈക്കോടതിയിൽ
