അബുദാബി: രാജ്യത്ത് കോവിഡ് നിയന്ത്രണങ്ങളിൽ കൂടുതൽ ഇളവുകൾ നൽകാൻ തീരുമാനിച്ച് യുഎഇ. ഈ മാസം പകുതിയോടെയാണ് നിയന്ത്രണങ്ങളിൽ ഇളവുകൾ നൽകുക. ഇളവുകൾ പ്രകാരം ഷോപ്പിങ് മാൾ, ടൂറിസം കേന്ദ്രങ്ങൾ, പൊതുഗതാഗത സംവിധാനങ്ങൾ, സ്ഥാപനങ്ങൾ തുടങ്ങി പൊതുസ്ഥലങ്ങളിൽ ആളുകളുടെ എണ്ണം വർധിപ്പിക്കും. കൂടാതെ മസ്ജിദുകളിൽ 2 മീറ്റർ അകലം പാലിച്ചിരുന്നത് ഒരു മീറ്ററാക്കി കുറക്കുകയും ചെയ്തു.
ജനസംഖ്യയുടെ ഭൂരിഭാഗം പേരും വാക്സിനും ബൂസ്റ്റർ ഡോസും എടുത്തതിനാൽ കോവിഡ് വ്യാപനത്തോത് കുറഞ്ഞതാണ് ഇളവിന് കാരണം. ആരോഗ്യസുരക്ഷ ഉറപ്പുവരുത്തി നിയന്ത്രണങ്ങളിൽ ഇളവു നൽകാനാണ് തീരുമാനിച്ചിരിക്കുന്നത്. ഘട്ടം ഘട്ടമായി നിയന്ത്രണം പൂർണമായി നീക്കുമെന്നും കൂടുതൽ വിശദാംശങ്ങൾ വരും ദിവസങ്ങളിൽ പ്രഖ്യാപിക്കുമെന്നും അധികൃതർ അറിയിച്ചു.
വിവാഹം, മരണം, മറ്റു സാമൂഹിക പരിപാടികൾ എന്നിവയിൽ പങ്കെടുക്കാവുന്നവരുടെ എണ്ണവും വർധിപ്പിക്കുമെന്ന് അധികൃതർ അറിയിച്ചു. കൂടാതെ ഇക്കാര്യത്തിൽ അതാത് എമിറേറ്റുകൾ ആയിരിക്കും തീരുമാനം എടുക്കുക. എന്നാൽ പൊതുസ്ഥലങ്ങളിലെ പ്രവേശനത്തിന് അൽഹൊസൈൻ ആപ്പിലെ ഗ്രീൻപാസ് തുടരുമെന്നും വ്യക്തമാക്കി.
Read also: മീഡിയ വൺ ചാനൽ നൽകിയ ഹരജിയിൽ സാവകാശം തേടി കേന്ദ്ര സർക്കാർ