മുംബൈ: വിജയ് ഹസാരെ ട്രോഫിയിൽ കേരളത്തിന് തുടർച്ചയായ രണ്ടാം ജയം. ഉത്തർപ്രദേശിനെ 3 വിക്കറ്റിന് തോൽപിച്ചാണ് കേരളം രണ്ടാം ജയം കുറിച്ചത്. യുപി മുന്നോട്ടുവച്ച 284 റൺസിന്റെ വിജയലക്ഷ്യം 7 വിക്കറ്റ് നഷ്‌ടത്തിൽ 48.5 ഓവറിൽ മറികടന്നു. റോബിൻ ഉത്തപ്പ (81), ക്യാപ്റ്റൻ സച്ചിൻ ബേബി (76) എന്നിവർ കേരളത്തിനായി തിളങ്ങി.
ആദ്യ ഇന്നിംഗ്‌സിൽ അഞ്ച് വിക്കറ്റ് വീഴ്‌ത്തിയ ശ്രീശാന്ത് ആണ് ഉത്തർപ്രദേശിനെ തകർത്തത്. അഭിഷേക് ഗോസ്വാമി (54), പ്രിയം ഗാർഗ് (57), അക്ഷദീപ് നാഥ് (68) എന്നിവരുടെ അർധ സെഞ്ചുറികളുടെ ബലത്തിലാണ് ഉത്തർപ്രദേശ് മികച്ച സ്‌കോർ കുറിച്ചത്. അവസാന ഓവറുകളിൽ തകർത്തെറിഞ്ഞ ശ്രീശാന്ത് കൂറ്റൻ സ്‌കോറിൽ നിന്ന് ഉത്തർപ്രദേശിനെ തടയുകയായിരുന്നു. 9.4 ഓവറിൽ 65 റൺസ് വഴങ്ങിയാണ് ശ്രീശാന്ത് അഞ്ച് വിക്കറ്റ് വീഴ്‌ത്തിയത്.
മറുപടി ബാറ്റിംഗിൽ റോബിൻ ഉത്തപ്പയുടെയും, സച്ചിൻ ബേബിയുടെയും അർധ സെഞ്ചുറി മികവിൽ കേരളം ജയം നേടുകയായിരുന്നു. രണ്ടാം മൽസരത്തിലും മികച്ച ഇന്നിംഗ്‌സിലേക്ക് എത്താൻ സഞ്‌ജു സാംസണ് കഴിഞ്ഞില്ല. 29 റൺസെടുത്ത സഞ്‌ജു റണ്ണൗട്ടാവുകയായിരുന്നു.
Read Also: ഐഎസ്എൽ; ഹൈദരാബാദും എടികെയും ഇന്ന് നേർക്കുനേർ
