കൊച്ചി : ഉല്ഘാടനത്തിന് മുന്പ് വൈറ്റില മേല്പ്പാലം തുറന്ന് വാഹനങ്ങള് കടത്തി വിട്ട സംഭവത്തില് നാല് പേര് അറസ്റ്റില്. സംഭവവുമായി ബന്ധപ്പെട്ട് വി ഫോര് കൊച്ചി പ്രവര്ത്തകരായ 4 പേരാണ് അറസ്റ്റിലായത്. നിപുണ് ചെറിയാന്, സൂരജ്, ആഞ്ചലോസ്, റാഫേല് എന്നിവര്ക്കെതിരെ അനധികൃതമായി സംഘം ചേര്ന്നതിനാണ് മരട് പോലീസ് കേസെടുത്തത്.
സംസ്ഥാന സര്ക്കാര് ഇതുവരെ ജനങ്ങള്ക്ക് തുറന്ന് കൊടുക്കാത്ത പാലമാണ് ഇന്നലെ രാത്രിയില് ഒരു സംഘം ആളുകള് എത്തി തുറന്നത്. ഇതിനെ തുടര്ന്ന് നിരവധി വാഹനങ്ങള് ഇതുവഴി കടത്തി വിടുകയായിരുന്നു. പാലത്തിന്റെ ഒരു വശത്ത് സ്ഥാപിച്ചിരുന്ന ബാരിക്കേഡുകള് എടുത്തു മാറ്റിയാണ് ലോറി അടക്കമുള്ള വാഹനങ്ങൾ പാലത്തിലൂടെ കടത്തി വിട്ടത്.
വലിയ വാഹനങ്ങള് ഉള്പ്പടെ കയറിയതിനാല് പാലത്തില് ഗതാഗത കുരുക്ക് രൂക്ഷമായി. തുടര്ന്ന് പോലീസെത്തി വാഹനങ്ങള് പിറകോട്ടിറക്കി പാലം വീണ്ടും അടക്കുകയായിരുന്നു. ശനിയാഴ്ച പാലത്തിന്റെ ഉല്ഘാടനം നടക്കാന് പോകുന്ന സാഹചര്യത്തിലാണ് ഇത്തരം സംഭവങ്ങള് അരങ്ങേറിയത്. കൂടാതെ മേല്പ്പാലം തുറന്നു കൊടുക്കുന്നതില് കാലതാമസം ഉണ്ടാകുന്നതായി ആരോപിച്ച് വി ഫോര് കൊച്ചി സമരം ചെയ്തിരുന്നു.
Read also : കേരളത്തില് ഇന്ന് കനത്ത മഴക്ക് സാധ്യത; ഇടുക്കിയില് യെല്ലോ അലേര്ട്ട്