ന്യൂഡെൽഹി: തങ്ങൾ മുന്നോട്ട് വെക്കുന്ന ന്യായമായ ആവശ്യങ്ങൾ അംഗീകരിച്ചില്ലെങ്കിൽ ജനുവരി 26ന് നടക്കുന്ന റിപ്പബ്ളിക്ക് ദിന പരേഡിൽ അണിനിരക്കുമെന്ന് കേന്ദ്ര സർക്കാരിന് കർഷകരുടെ മുന്നറിയിപ്പ്. ഡെൽഹി ചലോ പ്രക്ഷോഭം 8ആം ദിവസത്തിലേക്ക് കടക്കുമ്പോൾ സമരത്തിന് രാജ്യവ്യാപക പിന്തുണ ലഭിക്കുന്നത് സർക്കാരിനെ പ്രതിസന്ധിയിലാക്കുന്നുണ്ട്.
കർഷകരും കേന്ദ്രവുമായുള്ള മൂന്നാം ഘട്ട ചർച്ച ഇന്ന് ഡെൽഹിയിൽ നടക്കുകയാണ്. 40 കർഷകരാണ് കേന്ദ്ര സർക്കാർ പ്രതിനിധികളുമായുള്ള ചർച്ചക്കായി എത്തിയത്. ചർച്ചയെ ഏറെ പ്രതീക്ഷയോടെയാണ് കാണുന്നതെന്ന് കർഷക നേതാവ് രാകേഷ് ടികാന്ത് അഭിപ്രായപ്പെട്ടു.
കർഷകരുമായുള്ള ചർച്ചക്ക് അനുകൂല ഫലമുണ്ടാകുമെന്നാണ് പ്രതീക്ഷിക്കുന്നതെന്ന് കേന്ദ്ര കൃഷി മന്ത്രി നരേന്ദ്ര സിങ് തോമർ പറഞ്ഞു. ചർച്ചക്ക് മുൻപായി കേന്ദ്ര ആഭ്യന്തര മന്ത്രി അമിത് ഷായുമായും തോമർ കൂടിക്കാഴ്ച നടത്തി. കേന്ദ്ര മന്ത്രി പിയൂഷ് ഗോയലും കർഷകരുമായുള്ള ഇന്നത്തെ ചർച്ചയിൽ പങ്കെടുക്കുന്നുണ്ട്.
Read also: മുസ്ലിം പള്ളികളിൽ ഉച്ചഭാഷിണിയിൽ ബാങ്ക് കൊടുക്കുന്നത് നിരോധിക്കണം; ശിവസേന