ന്യൂയോര്‍ക്ക്: 13.72 കോടി പിന്നിട്ട് ലോകത്തെ കോവിഡ് ബാധിതരുടെ എണ്ണം. അഞ്ചര ലക്ഷത്തിലധികം പുതിയ കേസുകളാണ് റിപ്പോര്‍ട് ചെയ്യപ്പെട്ടത്. രോഗമുക്‌തി നേടിയവരുടെ എണ്ണം 11 കോടി ആയി ഉയര്‍ന്നപ്പോൾ മരണസംഖ്യ 29.58 ലക്ഷം കടന്നു.
രോഗബാധിതരുടെ എണ്ണത്തില്‍ ലോകത്ത് ഒന്നാം അമേരിക്കയാണ് ഒന്നാമതായി തുടരുന്നത്. യുഎസില്‍ 3.19 കോടി പേര്‍ക്കാണ് ഇതുവരെ കോവിഡ് സ്ഥിരീകരിച്ചത്. 24 മണിക്കൂറിനിടെ അരലക്ഷത്തിലധികം പുതിയ കേസുകള്‍ റിപ്പോര്‍ട് ചെയ്‌ത രാജ്യത്ത് ഇതുവരെ കോവിഡ് മൂലം മരണപ്പെട്ടത് 5.76 ലക്ഷം ആളുകളാണ്.
രോഗബാധിതരുടെ എണ്ണത്തിൽ രണ്ടാമതുള്ള ബ്രസീലിലും സ്‌ഥിതി രൂക്ഷമാണ്. രാജ്യത്ത് 1.35 കോടി രോഗബാധിതരാണ് ഉള്ളത്. മരണസംഖ്യ 3.55 ലക്ഷമായി ഉയര്‍ന്നു.
ഇന്ത്യയിലും കോവിഡ് വ്യാപനം അതീവ ഗുരുതരമായി തുടരുകയാണ്. കഴിഞ്ഞ ദിവസം 1,68,912 പേര്‍ക്കാണ് രാജ്യത്ത് വൈറസ് ബാധ സ്ഥിരീകരിച്ചത്. ഇതോടെ രാജ്യത്തെ ആകെ രോഗബാധിതരുടെ എണ്ണം 1.35 കോടി പിന്നിട്ടു. നിലവിൽ പത്ത് ലക്ഷത്തിലധികം പേർ ചികിൽസയിലുള്ള രാജ്യത്ത് കോവിഡ് മരണസംഖ്യ 1.70 ലക്ഷമായി ഉയര്‍ന്നതായി കണക്കുകൾ വ്യക്‌തമാക്കുന്നു.
അതേസമയം ഫ്രാൻസിലും റഷ്യയിലും ബ്രിട്ടനിലുമെല്ലാം സ്‌ഥിതിഗതികൾ ഗുരുതരമാണ്. ഫ്രാന്‍സില്‍ രോഗബാധിതരുടെ എണ്ണം 50 ലക്ഷം കടന്നു. കൂടാതെ മരണസംഖ്യ ഒരു ലക്ഷത്തോട് അടുക്കുകയാണ്. റഷ്യയില്‍ 46 ലക്ഷം പേര്‍ക്കും, ബ്രിട്ടനില്‍ 43 ലക്ഷം പേര്‍ക്കുമാണ് ഇതുവരെ വൈറസ് ബാധ സ്ഥിരീകരിച്ചത്.
Read Also: സംസ്‌ഥാനത്തേക്ക് കൂടുതൽ വാക്‌സിൻ; രണ്ട് ലക്ഷം ഡോസ് നാളെയെത്തും
