മാനന്തവാടി: അതിമാരക മയക്കുമരുന്നായ എംഡിഎംഎയുമായി ജില്ലയില്‍ രണ്ട് പേര്‍ പിടിയില്‍. ചൂട്ടക്കടവ് സ്വദേശി എ. ജയപാണ്ടി (21), മാനന്തവാടി അമ്പുകുത്തി സ്വദേശി ഷെഫീഖ് കെ. വി (27) തുടങ്ങിയവരെയാണ് മാനന്തവാടി എക്‌സൈസ് ഇന്‍സ്‌പെക്ടര്‍ ഷറഫുദ്ദിന്റെ നേതൃത്വത്തില്‍ പിടികൂടിയത്. ഇവര്‍ക്കെതിരെ എന്‍ഡിപിഎസ് വകുപ്പ് പ്രകാരം കേസെടുത്തു. അറസ്റ്റിലായവരോടൊപ്പം ഉണ്ടായിരുന്ന, മാനന്തവാടി സ്വദേശികളായ ജിന്‍ഷാദും ഷംനാസും സംഭവസ്ഥലത്ത് നിന്നും രക്ഷപെട്ടു.
1ഗ്രാം എംഡിഎംഎയും 100ഗ്രാം കഞ്ചാവുമാണ് സംഘത്തിന്റെ പക്കലുണ്ടായിരുന്നത്. ‘പാര്‍ട്ടി ഡ്രഗ്’ എന്നറിയപ്പെടുന്ന എംഡിഎംഎ, 0.5 ഗ്രാമെങ്കിലും കൈവശം വെക്കുന്നത് 10 വര്‍ഷം വരെ ശിക്ഷ ലഭിക്കാവുന്ന കുറ്റമാണ്. പ്രതികളെ വീഡിയോ കോണ്‍ഫറന്‍സിംഗ് വഴി മാനന്തവാടി കോടതി മുന്‍പാകെ ഹാജരാക്കിയതിനുശേഷം, റിമാന്‍ഡ് ചെയ്തു. ജില്ലയില്‍, അടുത്തിടെ മയക്കുമരുന്ന് കേസുകളുടെ എണ്ണം വര്‍ധിക്കുകയാണ്. കൂടുതലും യുവാക്കളാണ് ഇത്തരം കേസുകളില്‍ എക്‌സൈസ് വകുപ്പിന്റെ പിടിയിലാകുന്നത്.
