തിരുവനന്തപുരം: വെഞ്ഞാറമൂട്ടില്‍ ബൈക്കില്‍ സഞ്ചരിക്കുകയായിരുന്ന യുവാക്കളെ തടഞ്ഞു നിര്‍ത്തി വെട്ടിക്കൊന്നു. തേമ്പാന്‍മൂട് കലുങ്കിന്‍മുഖം സ്വദേശി ഹക്ക് മുഹമ്മദ് (28), വെമ്പായം തേവലക്കാട് മിഥിലാജ് (32), എന്നിവരാണ് കൊല്ലപ്പെട്ടത്.
വെഞ്ഞാറമൂട് തേമ്പാന്‍മൂട്ടില്‍ രാത്രി 12 മണിയോടെയാണ് സംഭവം. ബൈക്കില്‍ സഞ്ചരിക്കുകയായിരുന്ന ഇവരെ മാരകായുധങ്ങളുമായി എത്തിയ ഒരു സംഘം ആക്രമിക്കുകയായിരുന്നു. ബൈക്കില്‍ ഇവര്‍ക്ക് ഒപ്പം ഉണ്ടായിരുന്ന ഷഹിന്‍ എന്ന യുവാവ് നിസ്സാര പരുക്കുകളോടെ രക്ഷപെട്ടു.
ഡിവൈഎഫ്‌ഐ കലുങ്കിന്‍മുഖം യൂണിറ്റ് പ്രസിഡന്റാണ് ഹക്ക്. തേവലക്കാട് യൂണിറ്റ് അംഗമാണ് മിഥിലാജ്. പ്രദേശത്ത് പതിവായി സിപിഎം- കോണ്‍ഗ്രസ് സംഘര്‍ഷം നിലനില്‍ക്കുന്നതാണ്. സംഭവത്തിനു പിന്നില്‍ കോണ്‍ഗ്രസ് ആണെന്ന് സിപിഎം ആരോപിച്ചു.
