തിരുവനന്തപുരം: ജില്ലയിലെ മെഡിക്കൽ കോളേജിൽ കോവിഡ് വ്യാപനം രൂക്ഷമാകുന്നു. ഇന്ന് മാത്രം സീനിയർ ഡോക്ടർമാർ ഉൾപ്പടെ 51 പേർക്കാണ് രോഗബാധ ഉണ്ടായത്. ഇവരിൽ 14 പേർക്ക് കോവിഡ് സ്ഥിരീകരിച്ചത് രണ്ടാം തവണയാണ്. കൂടാതെ കഴിഞ്ഞ 11 ദിവസത്തിനിടെ മെഡിക്കൽ കോളേജിലെ 245 പേർക്കാണ് കോവിഡ് സ്ഥിരീകരിച്ചത്. ജൂനിയർ ഡോക്ടർമാരും, സ്റ്റാഫ് നഴ്സുമാരും, മെഡിക്കൽ വിദ്യാർഥികളും ഇതിൽ ഉൾപ്പെടുന്നുണ്ട്.
അതേസമയം സംസ്ഥാനത്ത് ഇന്ന് കോവിഡ് ബാധിതരുടെ എണ്ണത്തിൽ വലിയ വർധനയാണ് ഉണ്ടായത്. 24 മണിക്കൂറിൽ 34,199 പേർക്കാണ് കോവിഡ് സ്ഥിരീകരിച്ചത്. ഇന്ന് ഏറ്റവും കൂടുതൽ കോവിഡ് ബാധിതർ റിപ്പോർട് ചെയ്തത് എറണാകുളം ജില്ലയിലാണ്. കൂടാതെ 54 പേർക്ക് ഒമൈക്രോണും സ്ഥിരീകരിച്ചിട്ടുണ്ട്.
തിരുവനന്തപുരം ജില്ലയിലെ കോവിഡ് ബാധ നിലവിൽ രൂക്ഷമായി തുടരുകയാണ്. വിദ്യാഭ്യാസ സ്ഥാപനങ്ങളിൽ ഉൾപ്പടെ കോവിഡ് ക്ളസ്റ്റർ രൂപപ്പെടുന്ന സാഹചര്യമാണ് നിലവിൽ. 12 വിദ്യാഭ്യാസ സ്ഥാപനങ്ങളിലാണ് നിലവിൽ തിരുവനന്തപുരത്ത് കോവിഡ് ക്ളസ്റ്റർ രൂപപ്പെട്ടത്.
Read also: യുപിയില് ബിജെപി-അപ്നാ ദള്-നിഷാദ് പാര്ട്ടി കൂട്ടുകെട്ട്; 403 സീറ്റുകളില് മൽസരിക്കും