ഹൈദരാബാദ്: കോവിഡിനെതിരെ ഇന്ത്യ വികസിപ്പിക്കുന്ന കൊവാക്സിന് മൂന്നാംഘട്ട പരീക്ഷണം തുടങ്ങി. കമ്പനി ചെയര്മാന് കൃഷ്ണ എല്ലയാണ് ഇക്കാര്യം അറിയിച്ചത്. ഹൈദരാബാദ് കേന്ദ്രമായി പ്രവര്ത്തിക്കുന്ന ഭാരത് ബയോടെക് എന്ന കമ്പനിയാണ് വാക്സിന് വികസിപ്പിക്കുന്നത്. വാക്സിന് വികസനം പുരോഗമിക്കുന്നുണ്ടെങ്കിലും 1.3 ബില്ല്യണ് ആളുകളിലേക്ക് വാക്സിന് എത്തിക്കുന്നത് സംബന്ധിച്ച് ആശങ്കയുണ്ടെന്നും അദ്ദേഹം പറഞ്ഞു.
ഇന്ത്യന് സ്കൂള് ഓഫ് ബിസിനസ് സംഘടിപ്പിച്ച പരിപാടിയില് സംസാരിക്കുകയായിരുന്നു കൃഷ്ണ എല്ല. വിദേശകാര്യ മന്ത്രാലയത്തിലെ ഉന്നത ഉദ്യോഗസ്ഥര് അടക്കം പങ്കെടുത്ത പരിപാടിയിലാണ് അദ്ദേഹം ഇക്കാര്യം പറഞ്ഞത്. രണ്ട് ഡോസ് ഇഞ്ചക്ഷനാണ് എന്നതില് തനിക്ക് സന്തോഷമില്ലെന്നും 2.6 ബില്ല്യണ് ഡോസ് വാക്സിന് ആവശ്യമായി വരുമെന്നും അദ്ദേഹം പറഞ്ഞു. മൂക്കില് ഒഴിക്കുന്ന ഒറ്റ ഡോസ് വാക്സിന് വികസിപ്പിക്കാനായി കമ്പനി ശ്രമിക്കുന്നുണ്ടെന്നും അദ്ദേഹം പറഞ്ഞു. ഏറെ പ്രതീക്ഷയോടെയാണ് രാജ്യം കൊവാക്സിനെ നോക്കി കാണുന്നത്.
