ന്യൂഡെൽഹി: രാജ്യത്തെ ആദ്യ തദ്ദേശീയ കോവിഡ് വാക്‌സിനായ ഭാരത് ബയോടെക്കിന്റെ ‘കോവാക്‌സിൻ‘ സെപ്റ്റംബറോടെ കുട്ടികൾക്കായി ലഭ്യമാകുമെന്ന് ഡെൽഹി എയിംസ് മേധാവി ഡോ. രൺദീപ് ഗുലേറിയ. ദേശീയ മാദ്ധ്യമമായ ഇന്ത്യ ടുഡേക്ക് നൽകിയ അഭിമുഖത്തിലാണ് ഗുലേറിയ കുട്ടികളുടെ വാക്‌സിനേഷനിൽ നിർണായക വിവരം പുറത്തുവിട്ടത്.
‘കൊവാക്‌സിന്റെ കുട്ടികളിലെ രണ്ടാം ഘട്ട പരീക്ഷണങ്ങൾ പൂർത്തിയാക്കിയ ശേഷം സെപ്റ്റംബറോടെ വിവരങ്ങൾ ലഭ്യമാകും, അതേ മാസം തന്നെ വാക്‌സിന് അംഗീകാരം ലഭിക്കുമെന്നാണ് പ്രതീക്ഷിക്കുന്നത്’ ഡോ. രൺദീപ് ഗുലേറിയ പറഞ്ഞു. കൂടാതെ ഫൈസർ-ബയോ എൻടെക്കിന്റെ വാക്‌സിന് ഇന്ത്യയിൽ അംഗീകാരം ലഭിക്കുകയാണെങ്കിൽ അതും കുട്ടികൾക്കുള്ള മികച്ച സാധ്യതകളിൽ ഒന്നാണെന്ന് അദ്ദേഹം ചൂണ്ടിക്കാട്ടി.
അതേസമയം കൊവാക്‌സിൻ കോവിഡ് വൈറസിനെതിരെ 77.8 ശതമാനം ഫലപ്രദമാണെന്ന റിപ്പോർട് ഇന്നലെ പുറത്തുവന്നിരുന്നു. ഡിസിജിഐയുടെ (ഡ്രഗ്‌സ്‌ കൺട്രോളർ ജനറൽ ഓഫ് ഇന്ത്യ) വിദഗ്‌ധ സമിതി അംഗീകരിച്ച കൊവാക്‌സിന്റെ മൂന്നാംഘട്ട പരീക്ഷണ ഫലത്തിലാണ് ഇക്കാര്യം വ്യക്‌തമാക്കുന്നത്‌.
Read Also: ഡെല്‍റ്റ പ്ളസ്: പാലക്കാട്ടെ രണ്ട് പഞ്ചായത്തുകള്‍ അടച്ചിടും; ജാഗ്രതാ നിർദ്ദേശം
