ന്യൂഡെൽഹി: കേന്ദ്ര സർക്കാർ റദ്ദാക്കിയ ആർട്ടിക്കിൾ 370 പുനഃസ്‌ഥാപിക്കണം എന്നത് പാകിസ്‌ഥാൻ പോലുള്ള രാജ്യങ്ങളുടെ ആവശ്യമാണെന്നും കോൺഗ്രസ് അവർക്കൊപ്പമാണോ എന്നും കേന്ദ്രമന്ത്രി രവിശങ്കർ പ്രസാദ്. വാർത്താ സമ്മേളനത്തിൽ ആയിരുന്നു അദ്ദേഹത്തിന്റെ ചോദ്യം. ജമ്മു-കശ്‌മീരിലെ നാഷണൽ കോൺഫറൻസ്, പിഡിപി തുടങ്ങിയ പാർട്ടികളുടെ ദേശവിരുദ്ധ കാഴ്‌ചപ്പാടിനെ കോൺഗ്രസ് പിന്തുണക്കുന്നുണ്ടോയെന്ന് അദ്ദേഹം ചോദിച്ചു.
“ആർട്ടിക്കിൾ 370 പുനഃസ്‌ഥാപിക്കണം എന്നതാണോ സോണിയ ഗാന്ധിയുടേയും രാഹുൽ ഗാന്ധിയുടേയും ആഗ്രഹം? ഇക്കാര്യത്തിൽ രാജ്യത്തിന് വിശദീകരണം നൽകണം. ജനദ്രോഹപരമായ നിയമങ്ങൾ പിൻവലിക്കുന്നതിനെ കോൺഗ്രസ് അംഗീകരിക്കുന്നുണ്ടോ? ചൈനയുടെ പിന്തുണയോടെ ജമ്മു-കശ്‌മീരിന്റെ പ്രത്യേക പദവി പുനഃസ്‌ഥാപിച്ചിരുന്നെങ്കിൽ എന്നാശിച്ച ഫാറൂഖ് അബ്‌ദുല്ലയുടെ രാജ്യ വിരുദ്ധ നിലപാടിനെയും ജമ്മു-കശ്‌മീരിന്റെ പതാക തിരികെ കൊണ്ടുവരുന്നതുവരെ ദേശീയപതാക ഉയർത്തില്ലെന്ന മെഹ്ബൂബ മുഫ്‌തിയുടെ നിലപാടിനേയും കോൺഗ്രസ് പിന്തുണക്കുന്നുണ്ടോ?”- അദ്ദേഹം ചോദിച്ചു.
ജമ്മു-കശ്‌മീരിലെ വിവിധ പാർട്ടികളുടെ സഖ്യമായ പീപ്പിൾസ് അലയൻസ് ഫോർ ഗുപ്‍കർ ഡിക്ളറേഷൻ എന്ന സംഘടനയെ ആക്രമിച്ചാണ് രവിശങ്കർ പ്രസാദിന്റെ ചോദ്യങ്ങൾ.
Also Read: നിധി ലഭിക്കാനായി മക്കളെ ബലി നല്‍കാന്‍ ശ്രമം; സഹോദരങ്ങള്‍ പിടിയില്‍
