എറണാകുളം: അച്ഛനൊപ്പം ട്രെയിനിൽ യാത്ര ചെയ്‌ത 16-കാരിക്ക് നേരെ ലൈംഗിക അതിക്രമം നടന്നതായി പരാതി. ഇന്നലെ രാത്രി എറണാകുളത്ത് നിന്ന് വരികയായിരുന്ന തൃശൂർ സ്വദേശിനിയായ പെൺകുട്ടിക്ക് നേരെയാണ് ട്രെയിനിൽ വെച്ച് അതിക്രമം ഉണ്ടായത്. കുട്ടിയുടെ ശരീരത്തിൽ മോശമായി സ്‌പർശിക്കാൻ ശ്രമിക്കുകയും, അശ്ളീലം പറയുകയും ചെയ്‌തുവെന്നാണ് പരാതിയിൽ പറയുന്നത്.
സംഭവത്തിൽ തൃശൂർ റെയിൽവേ പോലീസ് പോക്‌സോ പ്രകാരം കേസെടുത്തിട്ടുണ്ട്. ഗുരുവായൂർ എക്‌സ്‌പ്രസിലാണ് സംഭവം നടന്നത്. 50 വയസിന് മുകളിൽ പ്രായമുള്ള ആറോളം പേരാണ് അതിക്രമം കാട്ടിയതെന്നാണ് വിവരം. ഇവരെ ഇതുവരെ തിരിച്ചറിഞ്ഞിട്ടില്ല. അക്രമികളെ തടയാൻ ശ്രമിച്ച മലപ്പുറം സ്വദേശിയായ ഫാസിലിന് മർദ്ദനമേറ്റിട്ടുണ്ട്.
അതിനിടെ, സംഭവത്തിൽ റെയിൽവേ ഗാർഡിനോട് പരാതിപ്പെട്ടിട്ടും പോലീസിനെ അറിയിച്ചില്ലെന്ന് പെൺകുട്ടിയുടെ അച്ഛൻ ആരോപിച്ചു. തുടർന്ന് കുടുംബം തൃശൂർ പോലീസിൽ വിവരം അറിയിക്കുകയായിരുന്നു. വിശദമായി രേഖപ്പെടുത്തിയ ശേഷം കേസ് റെയിൽവേ പോലീസിന് കൈമാറുകയായിരുന്നു.
Most Read: സാമ്പത്തിക ധവള പത്രം ഇറക്കണം, വൈദ്യുതി ചാർജ് വർധന പ്രതിഷേധാർഹം; വിഡി സതീശൻ
