കൊല്ലം: തീവണ്ടികളിലെ എസി കോച്ചുകളിൽ രാത്രി മൊബൈൽ ഫോണും ലാപ്‌ടോപ്പും ചാർജ് ചെയ്യുന്നതിന് വിലക്ക്. മൊബൈൽ ഫോൺ ചാർജറുകൾ രാത്രി 11 മണി മുതൽ രാവിലെ 5 മണി വരെ നിർബന്ധമായും ഓഫ് ചെയ്‌തിടണമെന്ന് നിർദേശം നൽകിയിട്ടുണ്ട്.
തീപിടിത്ത സാധ്യതയുള്ളതിനാലാണ് തീവണ്ടികളിലെ എസി കോച്ചുകളിൽ രാത്രിയിൽ മൊബൈൽ ഫോൺ, ലാപ്ടോപ് എന്നിവ ചാർജ് ചെയ്യുന്നതിന് വിലക്ക് ഏർപ്പെടുത്തിയിരിക്കുന്നത്. നേരത്തെ തന്നെ ഇക്കാര്യം നിർദേശിച്ചിരുന്നുവെങ്കിലും പല തീവണ്ടികളിലും ഇത് പാലിക്കാറില്ല. ഇതിനെ തുടർന്നാണ് നിബന്ധന കർശനമാക്കിയിരിക്കുന്നത്. ജീവനക്കാർക്ക് ഇതുസംബന്ധിച്ച് സർക്കുലർ നൽകിയിട്ടുണ്ട്.
ഇക്കാര്യത്തിൽ വീഴ്‌ച വരുത്തിയ എസി മെക്കാനിക്ക് ഉൾപ്പടെയുള്ള ജീവനക്കാർക്ക് ദക്ഷിണ റെയിൽവേ താക്കീത് നൽകിയിരുന്നു. എന്നിട്ടും ഇതിൽ മാറ്റമില്ലാത്ത സാഹചര്യത്തിൽ മിന്നൽ പരിശോധനകൾ നടത്താനും ജീവനക്കാരുടെ വീഴ്‌ച കണ്ടെത്തിയാൽ കർശന നടപടി എടുക്കാനുമാണ് തീരുമാനം.
Read also: സൂക്ഷ്‌മ പരിശോധന പൂർത്തിയായി; ജില്ലയിൽ 41 സ്‌ഥാനാർഥികൾ
