കൊച്ചി: നടിയെ ആക്രമിക്കുന്നതിന്റെ ദൃശ്യങ്ങൾ ദിലീപിന്റെ കൈവശമുണ്ടെന്ന് ക്രൈം ബ്രാഞ്ച്. ദിലീപിന്റെ സഹോദരൻ അനൂപിന്റെ ഫോണിൽ നിന്ന് ഇത് സംബന്ധിച്ച തെളിവുകൾ ലഭിച്ചതായി ക്രൈം ബ്രാഞ്ച് ഹൈക്കോടതിയെ അറിയിച്ചു. നടിയെ ആക്രമിച്ച കേസിന്റെ തുടരന്വേഷണത്തിന് കൂടുതൽ സമയം തേടിക്കൊണ്ടുള്ള അപേക്ഷയിലാണ് ക്രൈം ബ്രാഞ്ചിന്റെ വെളിപ്പെടുത്തൽ.
നടിയെ ആക്രമിക്കുന്ന ദൃശ്യങ്ങളുടെ ഓരോ സെക്കൻഡും അടിസ്ഥാനമാക്കിയുള്ള വിവരണം അനൂപിന്റെ ഫോണിൽ കണ്ടെത്തി. ദൃശ്യങ്ങൾ കൈവശമുണ്ട് എന്നതിന്റെ വ്യക്തമായ സൂചനയാണിതെന്നും ക്രൈം ബ്രാഞ്ച് ഹരജിയിൽ പറയുന്നു. ദിലീപിന്റെ ഫോണിൽ നിന്ന് 200 മണിക്കൂർ ദൈർഘ്യമുള്ള ഓഡിയോ ക്ളിപ്പുകളും പതിനായിരത്തിലേറെ വീഡിയോകളും ലഭിച്ചു.
അനൂപിന്റെയും സുരാജിന്റെയും ഫോണിൽ നിന്നും നിർണായക വിവരങ്ങൾ ലഭിച്ചു. ഈ വിവരങ്ങൾ സൂക്ഷ്മമായി പരിശോധിക്കാൻ കൂടുതൽ സമയം വേണമെന്ന് അപേക്ഷയിൽ പറയുന്നു. കോടതിയിൽ നിന്ന് ദൃശ്യങ്ങൾ ചോർന്നതിൽ അന്വേഷണം തടഞ്ഞ വിചാരണക്കോടതി ജഡ്ജിയുടെ നടപടി ആശ്ചര്യജനകമാണെന്നും ഹരജിയിൽ പറയുന്നു.
Most Read: 22ആം വയസിൽ ഗിന്നസ് റെക്കോർഡ്; ലോകത്തിലെ ഏറ്റവും പ്രായം കൂടിയ നായയായി ‘പെബ്ബിൾസ്’