കൊൽക്കത്ത: ബിജെപി അധികാരത്തിൽ എത്തിയാല്‍ ബംഗാളില്‍ സ്‌ത്രീ സുരക്ഷക്കായി ആന്റി റോമിയോ സ്‌ക്വാഡ് രൂപീകരിക്കുമെന്ന യുപി മുഖ്യമന്ത്രി യോഗി ആദിത്യനാഥിന്റെ പരാമര്‍ശത്തോട് പ്രതികരിച്ച് തൃണമൂല്‍ എംപി മഹുവ മൊയ്‌ത്ര. റോമിയോകളെ ഞങ്ങൾക്ക് ഇഷ്‌ടമാണെന്നായിരുന്നു മഹുവ പറഞ്ഞത്.
ട്വിറ്ററിലൂടെയായിരുന്നു മഹുവയുടെ പ്രതികരണം. ‘ഞങ്ങൾ ബംഗാളികൾ ഹൃദയം കൊണ്ട് സ്നേഹിക്കുന്നവരും സംഗീതത്തെയും, കവിതയെയും പ്രണയിക്കുന്നവരും ആണ്, ഒപ്പം റോമിയോകളെയും ഞങ്ങൾ ഇഷ്‌ടപ്പെടുന്നു’ മഹുവ പറഞ്ഞു.
ലൗ ജിഹാദിന് പിന്നാലെയാണ് പശ്‌ചിമ ബംഗാളില്‍ പുതിയ കാര്‍ഡിറക്കി യോഗി ആദിത്യനാഥ് രംഗത്തെത്തിയത്. ബംഗാളില്‍ ബിജെപി അധികാരത്തില്‍ വന്നാല്‍ സ്‌ത്രീ സുരക്ഷക്കായി യുപിയിൽ നിലവിലുള്ളത് പോലെ ‘ആന്റി-റോമിയോ സ്‌ക്വാഡ്’ രൂപീകരിക്കുമെന്നായിരുന്നു യോഗിയുടെ പ്രഖ്യാപനം.
ബംഗാളില്‍ തൃണമൂല്‍ കോണ്‍ഗ്രസ് ഭരണത്തിന് കീഴില്‍ സ്‌ത്രീകള്‍ സുരക്ഷിതരല്ലെന്നും അവരുടെ അവസ്‌ഥ വളരെ പരിതാപകരമാണെന്നും ചൂണ്ടിക്കാട്ടിയായിരുന്നു യോഗിയുടെ പുതിയ പരാമര്‍ശം. തിരഞ്ഞെടുപ്പ് റാലിക്കിടെയാണ് യോഗി പരാമർശം നടത്തിയത്.
Read Also: കോവിഡ് കാലത്ത് പരീക്ഷ; വിമർശിച്ച് പ്രിയങ്കാ ഗാന്ധി
