തിരുവനന്തപുരം: ലോക്‌സഭാ തിരഞ്ഞെടുപ്പിനുള്ള സിപിഐ സ്‌ഥാനാർഥി പട്ടികയായി. മാവേലിക്കരയിൽ സിഎ അരുൺ കുമാറിനെ മൽസരിപ്പിക്കാൻ സിപിഐ സംസ്‌ഥാന എക്‌സിക്യൂട്ടീവിൽ ധാരണയായി. വയനാട്ടിൽ ആനി രാജയും തിരുവനന്തപുരത്ത് പന്ന്യൻ രവീന്ദ്രനും തൃശൂരിൽ വിഎസ് സുനിൽ കുമാറും മൽസരിക്കും.
അന്തിമ തീരുമാനം ഇന്ന് വൈകിട്ട് മൂന്നമണിക്ക് ചേരുന്ന സംസ്‌ഥാന കൗൺസിൽ യോഗത്തിൽ ഉണ്ടാകും. സ്‌ഥാനാർഥികളെ പ്രഖ്യാപിക്കാനായി ഇന്ന് വൈകിട്ട് അഞ്ചുമണിക്ക് സംസ്‌ഥാന സെക്രട്ടറി ബിനോയ് വിശ്വം മാദ്ധ്യമങ്ങളെ കാണും. മാവേലിക്കരയിൽ സിഎ അരുൺകുമാറിന്റെ പേരിന് വേണ്ടത്ര സ്വീകാര്യത ലഭിച്ചിരുന്നില്ല. ജില്ലാ കൗൺസിൽ അംഗവും മന്ത്രി പി പ്രസാദിന്റെ അഡീഷണൽ പ്രൈവറ്റ് സെക്രട്ടറിയുമാണ് സിഎ അരുൺ കുമാർ.
ഡെപ്യൂട്ടി സ്‌പീക്കർ ചിറ്റയം ഗോപകുമാറിന്റെ പേരും ജില്ലാ കൗൺസിൽ നിർദ്ദേശിച്ചിരുന്നു. എന്നാൽ, അരുൺ കുമാറിന്റെ പേരിനാണ് എക്‌സിക്യൂട്ടീവിൽ മുൻ‌തൂക്കം ലഭിച്ചത്. തിരുവനന്തപുരത്ത് സ്‌ഥാനാർഥിയായി പരിഗണിക്കുന്ന മുതിർന്ന നേതാവും മുൻ സംസ്‌ഥാന സെക്രട്ടറിയുമായ പന്ന്യൻ രവീന്ദ്രൻ മൽസരത്തിന് പൂർണസമ്മതം അറിയിച്ചിട്ടില്ല.
Most Read| ഗ്യാൻവാപി പള്ളിയിൽ ആരാധന തുടരാം; ഹരജി തള്ളി അലഹാബാദ് ഹൈക്കോടതി
