ദുബായ്: ഏഷ്യൻ ബോക്‌സിങ് ചാമ്പ്യനാകാൻ മേരികോം ഇന്നിറങ്ങുന്നു. കസാഖിസ്‌ഥാന്റെ നാസിം കിസായിബേയ് ആണ് എതിരാളി. വൈകിട്ട് ഏഴരക്ക് ദുബായിലാണ് മൽസരം നടക്കുന്നത്. ടോക്കിയോ ഒളിമ്പിക്‌സിന് മുന്നോടിയായി പരിശീലന മൽസരമായാണ് മേരികോം ഇതിനെ കാണുന്നത്.
ഇവിടെ ജയിച്ചാൽ ഒളിമ്പിക്‌സ് റിംഗിൽ ആത്‌മവിശ്വാസത്തോടെ ഇറങ്ങാമെന്ന് താരം കണക്കുകൂട്ടുന്നു. സെമിയിൽ മംഗോളിയയുടെ ലുൽസൈ ഖാനെ തോൽപ്പിച്ചാണ് മേരി കോമിന്റെ മുന്നേറ്റം. കലാശപ്പോരിൽ നാസിം കിസായിബേയിക്ക് എതിരെ ഇറങ്ങുമ്പോൾ മേരികോമിന് തന്നെയാണ് മുൻതൂക്കം.
നേരത്തെ രണ്ട് തവണ ഇരുവരും ഏറ്റുമുട്ടിയപ്പോൾ മേരികോമിനായിരുന്നു ജയം. ടൂർണമെന്റിൽ അഞ്ച് തവണ താരം സ്വർണം നേടിയിട്ടുണ്ട്. ഇന്ത്യന്‍ താരങ്ങളില്‍ മേരികോമിന് പുറമെ 75 കിലോഗ്രാം വിഭാഗത്തിൽ പൂജ റാണിയും 81 കിലോഗ്രാമിൽ അനുപമയും ഫൈനലിൽ എത്തിയിട്ടുണ്ട്.
Read Also: ബോളിവുഡിലേക്ക് പറക്കാനൊരുങ്ങി വിശാഖ് നായർ; ചിത്രം ആഗസ്‌റ്റോടെ എത്തും
