കോട്ടയം: വളർത്തുപൂച്ചയെ അയൽവാസി വെടിവെച്ച് കൊല്ലാൻ ശ്രമിച്ചെന്ന് പരാതി. വൈക്കം തലയാഴം സ്വദേശികളുടെ പൂച്ചയ്ക്ക് നേരെയാണ് ആക്രമണം ഉണ്ടായത്. ഗുരുതരമായി പരിക്കേറ്റ പൂച്ച കോട്ടയം മൃഗാശുപത്രിയിൽ ചികിൽസയിലാണ്. രമേശൻ എന്നയാൾ എയർഗൺ ഉപയോഗിച്ച് ആക്രമിച്ചെന്നാണ് ആരോപണം.
വൈക്കം തലയാഴത്ത് പരണാത്ര വീട്ടിൽ രാജുവിന്റെയും സുജാതയുടെയും എട്ടുമാസം പ്രായമുള്ള ചിന്നു എന്ന പൂച്ചയ്ക്ക് നേരെയാണ് വെടിവെപ്പുണ്ടായത്. റോഡരികിൽ രക്തം വാർന്ന് അവശനിലയിൽ കണ്ടെത്തുകയായിരുന്നു.
കഴിഞ്ഞദിവസം രമേശന്റെ വളർത്തു പ്രാവിനെ ചിറകൊടിഞ്ഞ നിലയിൽ കണ്ടെത്തിയിരുന്നു. ഇതിന് പിന്നിൽ ഈ പൂച്ചയാണെന്ന് ആരോപിച്ച്, ഇതിൽ പ്രകോപിതനായാണ് എയർഗൺ ഉപയോഗിച്ച് വെടിവെച്ചതെന്ന് വീട്ടുകാർ പറയുന്നു.
കൂടാതെ നേരത്തെ വളർത്തിയ പതിനഞ്ചിലധികം പൂച്ചകളെ മരിച്ച നിലയിൽ കണ്ടെത്തിയിട്ടുണ്ടെന്നും സുജാതയും രാജുവും പറയുന്നു. അയൽവാസിക്കെതിരെ പോലീസിൽ പരാതി നൽകാൻ ഒരുങ്ങുകയാണ് ഇവർ. അതേസമയം പൂച്ചയുടെ ശരീരത്തിൽ നിന്ന് പെല്ലറ്റ് നീക്കം ചെയ്തു.
Most Read: പിജി ഡോക്ടർമാരുടെ പ്രധാന ആവശ്യം അംഗീകരിച്ചതാണ്; ആരോഗ്യമന്ത്രി