തൃശൂർ: വടക്കാഞ്ചേരി കുണ്ടന്നൂരിൽ പടക്കപുരയ്‌ക്ക് തീപിടിച്ചു. കുണ്ടന്നൂർ സുന്ദരാക്ഷൻ എന്നയാളുടെ ഉടമസ്‌ഥതയിൽ ഉള്ള വെടിക്കെട്ട് പുരയ്‌ക്കാണ് തീപിടിച്ചത്. സംഭവത്തിൽ ഒരാൾക്ക് ഗുരുതരമായി പരിക്കേറ്റിട്ടുണ്ട്. കാവശേരി സ്വദേശി മണിക്കാണ് ഗുരുതരമായി പരിക്കേറ്റത്. ഇന്ന് വൈകിട്ട് അഞ്ചുമണിയോടെയാണ് സംഭവം.
വലിയ പൊട്ടിത്തെറിയോടെയാണ് സ്‌ഫോടനം നടന്നത്. പടക്കപ്പുര പൂർണമായും കത്തി നശിച്ചു. മിനിറ്റുകളുടെ വ്യത്യാസത്തിൽ രണ്ടു സ്‌ഫോടനങ്ങളാണ് ഉണ്ടായത്. വടക്കാഞ്ചേരി നഗരത്തിൽ മാത്രമല്ല, കുന്നംകുളം ഉൾപ്പടെയുള്ള പ്രദേശങ്ങളിലും പൊട്ടിത്തെറിയുടെ ശബ്‌ദം കേട്ടുവെന്ന് നാട്ടുകാർ പറഞ്ഞു. 20 കിലോമീറ്റർ പരിധിയിൽ സ്‌ഫോടന ശബ്‌ദം കേട്ടുവെന്നാണ് റിപ്പോർട്.
പാടശേഖരത്തിന് നാടുവിലായാണ് പടക്കപ്പുര സ്‌ഥിതി ചെയ്യുന്നത്. 600 മീറ്റർ അകലെ സ്‌ഥിതി ചെയ്യുന്ന വീടുകളുടെ ജനൽ ചില്ലുകളെല്ലാം തകർന്നിട്ടുണ്ട്. നിലവിൽ ഫയർഫോഴ്‌സ് എത്തി തീ അണയ്‌ക്കാനുള്ള ശ്രമം തുടരുകയാണ്.
Most Read: മുഹമ്മദ് ഫൈസലിന് ആശ്വാസം; ലക്ഷദ്വീപ് ഉപതിരഞ്ഞെടുപ്പ് മരവിപ്പിച്ചു
