കോഴിക്കോട്: മാഹി റെയിൽവേ സ്‌റ്റേഷന് സമീപം അഴിയൂരിൽ ബോംബ് ശേഖരം കണ്ടെത്തി. പുളിയേരി നടഭാഗം ഒതയോത്ത് പരവന്റെ വിടയിലെ റെയിൽവേ സ്‌റ്റേഷന് സമീപത്തെ ഒഴിഞ്ഞ പറമ്പിലാണ് ഒരു സ്‌റ്റീൽ ബോംബും അഞ്ച് നാടൻ ബോംബുകളും കണ്ടെത്തിയത്. സമീപവാസിയായ സ്‌ത്രീയാണ് ബോംബ് ആദ്യം കണ്ടത്.
സംഭവമറിഞ്ഞ നാട്ടുകാർ പരിഭ്രാന്തരായി സ്‌ഥലത്ത്‌ തടിച്ച് കൂടി. ചോമ്പാൽ പോലീസും ബോംബ് സ്‌ക്വാഡും സ്‌ഥലത്തെത്തി ബോംബുകൾ കസ്‌റ്റഡിയിൽ എടുത്തു. ആളൊഴിഞ്ഞ പ്രദേശമായ ഇവിടങ്ങളിൽ രാത്രി കാലങ്ങളിൽ അപരിചിതർ എത്താറുണ്ടെന്ന് പരിസരവാസികൾ പോലീസിനോട് പറഞ്ഞു.
വലിയ ഗ്രൗണ്ട് അടക്കമുള്ള പ്രദേശം സാമൂഹിക വിരുദ്ധരുടെ കേന്ദ്രമായി താവളമായി മാറിയിരിക്കുകയാണെന്ന് നാട്ടുകാർ പറയുന്നു. പ്രദേശത്ത് പോലീസിന്റെ നിരീക്ഷണം ശക്‌തമാക്കണമെന്നും പ്രദേശവാസികൾ ആവശ്യപ്പെട്ടു.
Also Read: ശക്‌തമായ കാറ്റും, മഴയും; ജില്ലയിൽ വിവിധ ഇടങ്ങളിൽ കനത്ത നാശനഷ്‌ടം
