തിരുവനന്തപുരം: കിഫ്ബിക്കെതിരായ സിഎജി റിപ്പോര്ട്ടില് പ്രതിപക്ഷത്തിന്റെ അടിയന്തര പ്രമേയത്തിന് അനുമതി. വിഡി സതീശനാണ് അടിയന്തര പ്രമേയ നോട്ടീസ് നല്കിയത്. കിഫ്ബി ഭരണഘടനാ വിരുദ്ധമാണെന്ന സിഎജി റിപ്പോര്ട്ടിലെ പരാമര്ശങ്ങള് ചര്ച്ച ചെയ്യണം എന്നാവശ്യപ്പെട്ട് ആയിരുന്നു നോട്ടീസ് നല്കിയത്. ഉച്ചക്ക് 12.30ന് പ്രമേയത്തിന്മേല് ചര്ച്ച നടക്കും.
അതേസമയം വിഷയത്തില് തുറന്ന ചര്ച്ചക്ക് തയാറാണെന്ന് ധനമന്ത്രി നേരത്തെ തന്നെ വ്യക്തമാക്കിയിരുന്നു. ജനങ്ങള് സത്യം അറിയണമെന്നും കഴിഞ്ഞ ദിവസത്തെ വാര്ത്താ സമ്മേളനത്തില് ധനമന്ത്രി പറഞ്ഞിരുന്നു.
കൂടാതെ സിഎജി റിപ്പോര്ട് ചോര്ച്ചയുമായി ബന്ധപ്പെട്ട എത്തിക്സ് കമ്മിറ്റി റിപ്പോര്ട്ടും ഇന്ന് നിയമസഭയില് വെക്കും. ധനമന്ത്രി തോമസ് ഐസക് അവകാശ ലംഘനം നടത്തിയില്ലെന്നാണ് എത്തിക്സ് കമ്മിറ്റി റിപ്പോര്ട്. പ്രതിപക്ഷത്തിന്റെ വിയോജന കുറിപ്പോടെയാകും റിപ്പോര്ട് സഭയില് വെക്കുക. നിയമസഭയില് വെക്കും മുന്പ് കിഫ്ബിക്കെതിരായ പരാമര്ശങ്ങള് അടങ്ങിയ റിപ്പോര്ട് ധനമന്ത്രി പുറത്ത് പറഞ്ഞതില് അവകാശ ലംഘനം ഇല്ലെന്നാണ് എത്തിക്സ് കമ്മിറ്റി കണ്ടെത്തിയിരുന്നത്.