വയനാട്: വ്യാജ വീഡിയോ എടുത്ത് സമൂഹ മാധ്യമങ്ങളിൽ പ്രചരിപ്പിച്ച യുവാക്കൾക്കെതിരെ കേസ്. കോവിഡ് മാനദണ്ഡങ്ങൾ ലംഘിച്ചതിന് എതിരെയാണ് യുവാക്കൾക്കെതിരെ പുൽപ്പള്ളി പോലീസ് കേസെടുത്തത്. വ്യാജ വാറ്റിനായി കൂട്ടത്തല്ല് എന്ന പേരിലാണ് യുവാക്കൾ വീഡിയോ പോസ്‌റ്റ് ചെയ്‌തത്‌. പുൽപ്പള്ളി വണ്ടിക്കടവ് സ്വദേശികളായ യൂജിൻ ജോസ് (21), ടിജെ ടിനു(22), കെബി റോബിൻ (22), അനീഷ് ചന്ദ്രൻ (24), ഇവി വിഷ്‌ണു (23), ശ്രീക്കുട്ടൻ രമേശൻ(22), എംവി അബിൻ(22), സിറ്റി രാഹുൽ (22) എന്നിവർക്കെതിരെയാണ് കേസ്.
ഒരു സംഘം ആളുകൾ വ്യാജ വാറ്റുകാരോട് മദ്യം ആവശ്യപ്പെടുകയും തുടർന്ന് ലഭിക്കാതായപ്പോൾ തമ്മിൽ തല്ലുന്നതുമാണ് വീഡിയോയുടെ ഉള്ളടക്കം. മദ്യം തന്നില്ലെങ്കിൽ വീഡിയോ പോലീസിനെ കാണിക്കണമെന്നും, പണി കൊടുക്കണമെന്നും പറഞ്ഞ് നിരവധി പേരാണ് സാമൂഹ മാധ്യമങ്ങളിൽ മറുപടിയുമായി എത്തിയത്. സംഭവം സത്യമാണെന്ന് കരുതി നിരവധി പേരാണ് വീഡിയോ പങ്കുവെച്ചത്.
യൂട്യൂബ് ചാനലിൽ വൈറലാകാനാണ് വീഡിയോ പോസ്‌റ്റ് ചെയ്‌തതെന്നും ഇതിൽ മറ്റൊരു ഉദ്ദേശം ഇല്ലെന്നും യുവാക്കൾ പോലീസിനോട് പറഞ്ഞു. വ്യാജ വാറ്റിനെതിരെ സമൂഹ മനസാക്ഷിയെ ഉണർത്തുകയാണ് വീഡിയോയിലൂടെ ലക്ഷ്യമിട്ടതെന്നും യുവാക്കൾ പറഞ്ഞു.
Read Also: കൊച്ചി നാവികസേനാ ആസ്‌ഥാനത്ത് നാവികൻ വെടിയേറ്റ് മരിച്ച നിലയിൽ
