മലപ്പുറം: ഓണത്തെ വരവേല്ക്കാനായി ഒരുക്കിയ ചെണ്ടുമല്ലി കൃഷിയില് വിജയം കൈവരിച്ച് കർഷക കൂട്ടായ്മ. താനൂർ നിറമരുതൂർ ഗ്രാമപഞ്ചായത്തിന് കീഴിലെ ഗ്രാമിക കർഷക കൂട്ടായ്മയാണ് കേരളത്തിൽ അപൂർവമായ ചെണ്ടുമല്ലി കൃഷിയിൽ വിജയം കൈവരിച്ചത്. സുഭിക്ഷ കേരളം പദ്ധതി പ്രകാരമാണ് പഞ്ചായത്ത് ചെണ്ടുമല്ലി പൂകൃഷി ആരംഭിച്ചത്.
മലയാളിയുടെ അത്തപ്പൂക്കളത്തിലെ നിറ സാന്നിധ്യമാണ് മല്ലി, ജമന്തി തുടങ്ങിയ പൂക്കള്. ഓണവിപണി ലക്ഷ്യമിട്ട് കൃഷി ചെയ്ത പൂക്കൾ വിളവെടുത്തു. കൃഷിക്ക് അധികം യോജിക്കാത്ത കടലോരത്താണ് ഇവ പൂത്തത് എന്ന പ്രത്യേകതയും ഉണ്ട്. ശാസ്ത്രീയമായി പരിപാലിച്ചാൽ പൂ കൃഷിയിൽ മികച്ച വിജയം കൈവരിക്കാം എന്ന് തെളിയിക്കുകയാണ് ഈ കര്ഷക കൂട്ടായ്മ.
തെങ്ങിൻ തോട്ടങ്ങളിൽ വിവിധ തരം ഇടവിളകൾ പ്രോത്സാഹിപ്പിക്കുന്ന പദ്ധതിയാണ് സുഭിക്ഷ കേരളം പദ്ധതി. ഇതിന്റെ ഭാഗമായാണ് ചെണ്ടുമല്ലി കൃഷി ആരംഭിച്ചത്. താനൂരിലെ വിവിധയിടങ്ങളിൽ ഒരുക്കിയിട്ടുള്ള മാതൃക തോട്ടങ്ങളിൽ നിന്ന് പൂക്കൾ മലപ്പുറം, തൃശൂർ, കോഴിക്കോട് ജില്ലകളിലെ ഓണ വിപണിയിലേക്കെത്തിക്കാനാണ് കൃഷി വകുപ്പിന്റെ തീരുമാനം.