ന്യൂ ഡെൽഹി: അരുണാചൽ പ്രദേശിൽ നിന്ന് കാണാതായ അഞ്ച് ഇന്ത്യൻ പൗരന്മാരെ ചൈന നാളെ കൈമാറും. കിബിത്തു അതിർത്തി ഉദ്യോഗസ്ഥരുടെ മീറ്റിംഗ് പോയിന്റിനടുത്തുള്ള വാച്ചയിലായിരിക്കും ഇവരുടെ കൈമാറ്റം നടക്കുകയെന്ന് ഇന്ത്യൻ സൈനിക വൃത്തങ്ങൾ അറിയിച്ചു.
കേന്ദ്രമന്ത്രി കിരൺ റിജിജുവും വാർത്ത സ്ഥിരീകരിച്ചു. സെപ്റ്റംബർ 12 ന് (ശനിയാഴ്ച) എപ്പോൾ വേണമെങ്കിലും നിശ്ചിത സ്ഥലത്തു വച്ച് കൈമാറ്റം നടക്കുമെന്ന് അദ്ദേഹം ട്വീറ്റ് ചെയ്തു.
The Chinese PLA has confirmed to Indian Army to hand over the youths from Arunachal Pradesh to our side. The handing over is likely to take place anytime tomorrow i.e. 12th September 2020 at a designated location. https://t.co/UaM9IIZl56
— Kiren Rijiju (@KirenRijiju) September 11, 2020
അപ്പർ സുബൻസിരി ജില്ലയിലെ ഇന്ത്യ-ചൈന അതിർത്തി പ്രദേശത്തെ വനമേഖലയിൽ നായാട്ടിന് പോയ അഞ്ച് പേരെയാണ് ചൈനീസ് സൈന്യം തട്ടിക്കൊണ്ടു പോയത്. നാചോ മേഖലയിലാണ് സംഭവം. സംഘത്തിൽ ഉണ്ടായിരുന്നവരിൽ രക്ഷപ്പെട്ട രണ്ട് പേരാണ് വിവരം പോലീസിനെ അറിയിച്ചത്. കോൺഗ്രസ് എംഎൽഎ നിനോങ് എറിങ് ആണ് സംഭവം ട്വീറ്റിലൂടെ പുറംലോകത്തെ അറിയിച്ചത്. ഇതുമായി ബന്ധപ്പെട്ട് ചൈനീസ് സൈന്യത്തിന് കൃത്യമായ തിരിച്ചടി നൽകണമെന്ന് നിനോങ് എറിങ് അഭിപ്രായപ്പെട്ടിരുന്നു. ഏതാനും മാസങ്ങൾക്ക് മുമ്പ് സമാനസംഭവം ഉണ്ടായതായും അദ്ദേഹം പറ‍ഞ്ഞിരുന്നു.
National News: ഏത് വെല്ലുവിളിയും നേരിടാൻ സൈന്യം സജ്ജം; ബിപിൻ റാവത്ത്
നാലുമാസത്തിലേറെയായി ലഡാക്കിൽ ഇന്ത്യ-ചൈന സംഘർഷം തുടരുന്നതിനിടെയാണ് അരുണാചൽ പ്രദേശിൽ ഇന്ത്യക്കാരെ തട്ടിക്കൊണ്ടുപോയ വിവരം പുറത്തുവന്നത്.
