പാലക്കാട്: മാങ്ങയും പണവും മോഷ്‌ടിച്ചെന്ന് ആരോപിച്ചു 17-കാരനെ കെട്ടിയിട്ടു മർദ്ദിച്ചതായി പരാതി. പാലക്കാട് എരുത്തേമ്പതി വണ്ണാമടയിലാണ് സംഭവം. എരുത്തേമ്പതി വണ്ണാമട മലയാണ്ടി കൗണ്ടന്നൂർ സ്വദേശിയായ കുമാർ രാജിനാണ് (17) മർദ്ദനമേറ്റത്. മരക്കഷ്‌ണവും ചെരുപ്പും ഉപയോഗിച്ചായിരുന്നു മർദ്ദനം. കഴിഞ്ഞ ഞായറാഴ്‌ചയാണ് സംഭവം.
സംഭവത്തിൽ മലയാണ്ടി കൗണ്ടന്നൂർ സ്വദേശികളായ മൂന്ന് പേർക്കെതിരെ പോലീസ് കേസെടുത്തു. പലചരക്ക് കട നടത്തുന്ന പരമശിവം, ഭാര്യ ജ്യോതിമണി, മകൻ വസന്ത് എന്നിവർക്ക് എതിരേയാണ് കേസ്. കടയിൽ നിന്ന് പണവും മാമ്പഴവും മോഷ്‌ടിക്കുന്നതിന്റെ സിസിടിവി ദൃശ്യങ്ങൾ കണ്ടതുകൊണ്ടാണ് കുട്ടിയെ മർദ്ദിച്ചതെന്ന് പ്രതികൾ പറയുന്നു. സംഭവത്തിൽ കൊഴിഞ്ഞാമ്പാറ പോലീസാണ് കേസെടുത്തിരിക്കുന്നത്.
Most Read: സാമുദായിക സംഘർഷം; സമാധാന ശ്രമത്തിന് അമിത് ഷാ മണിപ്പൂരിലേക്ക്
