തിരുവനന്തപുരം: സംസ്ഥാനത്ത് കോവിഡ് ഡ്യൂട്ടിചെയ്യുന്ന , പ്രതിരോധപ്രവർത്തനത്തിന്റെ താഴേത്തട്ടിൽ പ്രവർത്തിക്കുന്ന പോലീസുകാർക്ക് ‘കോവിഡ് പോരാളി ‘ പതക്കം സമ്മാനിക്കാൻ ഡിജിപിയുടെ തീരുമാനം.
റാങ്ക് വ്യത്യാസമില്ലാതെ കണ്ടെയ്ൻമെന്റ് സോണുകളിൽ ഉൾപ്പെടെ ആളുകളെ നിയന്ത്രിക്കാനും പരിശോധിക്കാനും നിയോഗിക്കപ്പെട്ട പോലീസുകാർക്കാണ് അംഗീകാരം. കോവിഡ് പ്രതിരോധനടപടികൾക്ക് കൂടുതൽ പ്രചോദനമാകാൻ നടപടി സഹായകരമാവും എന്നാണ് പ്രതീക്ഷ. ഒരു മാസമെങ്കിലും കോവിഡ് ഡ്യൂട്ടിയിൽ ഏർപ്പെട്ട പോലീസുകാരുടെ പട്ടിക തയ്യാറാക്കാൻ ജില്ലാപോലീസ് മേധാവികളോട് ഡിജിപി ആവശ്യപ്പെട്ടു.
കോവിഡ് കാലത്ത് ജോലിഭാരം കൂടിയിട്ടും റിസ്ക് അലവൻസ് ഉൾപ്പെടെയുള്ള ആനുകൂല്യങ്ങൾ വെട്ടിച്ചുരുക്കിയ നടപടി പോലീസുകാർക്കിടയിൽ വലിയ തോതിൽ എതിർപ്പിനിടയാക്കിയിരുന്നു. അത്തരമൊരു സാഹചര്യത്തിലാണ് ഇതുപോലൊരു പരിപാടിയിലൂടെ പോലീസുകാർക്ക് ആത്മവിശ്വാസം നൽകാൻ തലപ്പത്തു നിന്നും തീരുമാനം വന്നത്.