ബെയ്ജിങ്: കോവിഡ് കേസുകൾ ഗണ്യമായി ഉയർന്നതോടെ ചൈനയിൽ സേവനങ്ങളിൽ നിയന്ത്രണം ഏർപ്പെടുത്തി ഷാങ്ഹായ് ഇന്ത്യൻ കോൺസുലേറ്റ്. രോഗബാധ പ്രതിദിനം ഉയരുന്നതിനാൽ ആളുകൾക്ക് നേരിട്ട് നൽകുന്ന സേവനങ്ങൾക്കാണ് നിയന്ത്രണം ഏർപ്പെടുത്തിയിരിക്കുന്നത്.
കിഴക്കൻ ചൈനയിൽ നിന്നുള്ള ഇന്ത്യക്കാർക്ക് ബെയ്ജിങ്ങിലെ ഇന്ത്യൻ എംബസി ഉപയോഗപ്പെടുത്താമെന്നും കോൺസുലേറ്റ് പുറത്തിറക്കിയ വാർത്താ കുറിപ്പിൽ വ്യക്തമാക്കുന്നുണ്ട്. കോവിഡ് വ്യാപനത്തെ തുടർന്ന് ഷാങ്ഹായ് നഗരത്തിൽ ലോക്ക്ഡൗൺ നിയന്ത്രണങ്ങൾ ഏർപ്പെടുത്തിയിരിക്കുകയാണ്. അതിനാൽ തന്നെ വർക്ക് ഫ്രം ഹോം മാതൃകയിലുള്ള പ്രവർത്തനമാണ് കോൺസുലേറ്റ് നടത്തിവരുന്നതെന്നും വാർത്താ കുറിപ്പിൽ കൂട്ടിച്ചേർത്തിട്ടുണ്ട്.
ഷാങ്ഹായ് നഗരത്തിൽ നിലവിൽ ഒമൈക്രോൺ വകഭേദം പടർന്നു പിടിക്കുകയാണ്. കഴിഞ്ഞ ദിവസം 1,189 പോസിറ്റിവ് കേസുകളും 25,141 കോവിഡ് ലക്ഷണമില്ലാത്ത കേസുകളും ഇവിടെ റിപ്പോർട് ചെയ്തിട്ടുണ്ട്. ഇന്ത്യൻ കോൺസുലേറ്റ് പ്രവർത്തനം നിയന്ത്രിച്ചിട്ടും നഗരത്തിലെ ആയിരത്തിൽ പരം ഇന്ത്യക്കാർക്ക് കൗൺസിലിങ് അടക്കമുള്ള സംവിധാനങ്ങൾ ഏർപ്പെടുത്തിയതായും കോൺസൽ ജനറൽ ഡി നന്ദകുമാർ അറിയിച്ചു.
Read also: ഒമ്പത് വയസുകാരിക്ക് നേരെ പീഡനശ്രമം; അമ്മയുടെ സുഹൃത്ത് പിടിയിൽ