ന്യൂഡല്‍ഹി : രാജ്യത്ത് കഴിഞ്ഞ ദിവസവും കോവിഡ് ബാധിതരുടെ എണ്ണം 75000 കടന്നു. 77,266 പേര്‍ക്കാണ് രാജ്യത്ത് കഴിഞ്ഞ 24 മണിക്കൂറിനിടെ കോവിഡ് സ്ഥിരീകരിച്ചത്. ഇതോടെ ആകെ കോവിഡ് ബാധിതരുടെ എണ്ണം 33,87,500 ആയി ഉയര്‍ന്നു. രാജ്യത്ത് 1057 പേരാണ് കോവിഡ് മൂലം കഴിഞ്ഞ ദിവസം മരിച്ചത്. ആകെ മരണസംഖ്യ ഇതോടെ 61,529 ആയി.
60,177 പേര്‍ 24 മണിക്കൂറിനിടെ രോഗമുക്തരായെന്നാണ് കണക്കുകള്‍ സൂചിപ്പിക്കുന്നത്. ആകെ 25,83,948 പേര്‍ ഇതുവരെ രാജ്യത്ത് രോഗമുക്തരായിട്ടുണ്ട്. രാജ്യത്ത് ഇപ്പോള്‍ രോഗമുക്തി നിരക്ക് 76.28 ശതമാനം ആണ്. മഹാരാഷ്ട്ര, ആന്ധ്രാപ്രദേശ്, തമിഴ്‌നാട് എന്നിവിടങ്ങളില്‍ കോവിഡ് വ്യാപനം ഉയരുകയാണ്. പഞ്ചാബില്‍ കഴിഞ്ഞ ദിവസം ആറ് എംഎല്‍എ മാര്‍ക്ക് കൂടി കോവിഡ് സ്ഥിരീകരിച്ചു. ഡല്‍ഹിയില്‍ കോവിഡ് വ്യാപനം കുറഞ്ഞിരുന്നെങ്കിലും കഴിഞ്ഞ ദിവസങ്ങളിലായി രോഗബാധിതരുടെ എണ്ണം വര്‍ധിക്കുന്നുണ്ട്. കഴിഞ്ഞ ദിവസം 1840 പേര്‍ക്കാണ് ഡല്‍ഹിയില്‍ കോവിഡ് സ്ഥിരീകരിച്ചത്.
