മലപ്പുറം: കേരളത്തിൽ മത ധ്രുവീകരണത്തിന് സിപിഎം ശ്രമിക്കുന്നുവെന്ന് മുസ്ലിം ലീഗ് സംസ്ഥാന ജനറൽ സെക്രട്ടറി പിഎംഎ സലാം. മത ന്യൂനപക്ഷങ്ങളെ ഭിന്നിപ്പിച്ച് നേട്ടമുണ്ടാക്കാനാണ് സിപിഎമ്മിന്റെ ശ്രമമെന്നും ഇദ്ദേഹം പറഞ്ഞു. അനധികൃത സ്വത്ത് സമ്പാദന കേസിൽ ആരോപണ വിധേയനായ മുൻ എംഎൽഎ കെ എം ഷാജിക്ക് പാർട്ടിയുടെ പൂർണ പിന്തുണയുണ്ടെന്നും ഇദ്ദേഹം പറഞ്ഞു.
മലപ്പുറത്ത് വാർത്താ സമ്മേളനത്തിൽ സംസാരിക്കുകയായിരുന്നു പിഎംഎ സലാം. ജോർജ് എം തോമസ് പറഞ്ഞത് മത ധ്രുവീകരണത്തിനുള്ള സിപിഎം ശ്രമത്തിന്റെ ഭാഗമായാണ്. ലൗ ജിഹാദ് ഉത്തേരേന്ത്യയിൽ ബിജെപി ഉയർത്തുമ്പോൾ കേരളത്തിൽ സിപിഎം ആണ് ഉയർത്തുന്നത്. ജോർജ് എം തോമസിന്റേത് വെറുമൊരു നാക്കു പിഴയായി കാണാനാവില്ല.
പാർട്ടി സമ്മേളനം ചർച്ച ചെയ്തെന്നും പാർട്ടി രേഖയിൽ ലൗ ജിഹാദ് ഉണ്ടന്നും പറഞ്ഞതിൽ സിപിഎം സംസ്ഥാന നേതൃത്വം നിലപാട് വ്യക്തമാക്കണമെന്നും ഇദ്ദേഹം പറഞ്ഞു. കെഎം ഷാജിക്കെതിരായ അന്വേഷണം കേന്ദ്ര ഏജൻസികളെ കൊണ്ട് നേതാക്കളെ തകർക്കാനുള്ള ശ്രമത്തിന്റെ ഭാഗമാണെന്ന് ഇദ്ദേഹം ആരോപിച്ചു. ഇതിന് സംസ്ഥാന സർക്കാർ ഒത്താശ നൽകുകയാണ്. ഷാജി നിരപരാധിയെന്ന് തെളിയുമെന്നും പിഎംഎ സലാം പറഞ്ഞു.
Read Also: വധഗൂഢാലോചന കേസ്; അനൂപും സുരാജും ഇന്ന് ചോദ്യം ചെയ്യലിന് ഹാജരാകില്ല