ഡെല്‍ഹി: നീറ്റ്- പിജി കൗൺസിലിംഗ് വൈകുന്നതിനെതിരെ ഡെല്‍ഹിയിൽ സമരം നടത്തുന്ന ഡോക്‌ടർമാരുമായി കേന്ദ്ര ആരോഗ്യ മന്ത്രി ഇന്ന് ചർച്ച നടത്തും. നിർമാൻ ഭവനിലാണ് ചർച്ച. റസിഡന്റ് ഡോക്‌ടർമാരുടെ സമരം ശക്‌തമാകുന്ന പശ്‌ചാത്തലത്തിലാണ് ഡോക്‌ടര്‍മാരെ സര്‍ക്കാര്‍ ചര്‍ച്ചയ്‌ക്ക്‌ വിളിച്ചത്.
ഡോക്‌ടര്‍മാര്‍ ഇന്ന് സുപ്രീം കോടതിയിലേക്ക് നടത്തിയ മാര്‍ച്ച് പോലീസ് തടഞ്ഞു. സഫ്‌ദര്‍ജങ്ക് ആശുപത്രിക്ക് മുന്നിലാണ് പോലീസ് പ്രതിഷേധക്കാരെ തട‌ഞ്ഞത്. ഇന്നലെ ഐടിഒയില്‍ നിന്ന് സുപ്രീം കോടതിയിലേക്ക് നടത്തിയ മാര്‍ച്ച് സംഘര്‍ഷത്തില്‍ കലാശിച്ചിരുന്നു. ഇതിന് പിന്നാലെ രാത്രി കേന്ദ്ര ആരോഗ്യ മന്ത്രിയുടെ വസതിയിലേക്കും ഡോക്‌ടര്‍മാര്‍ മാര്‍ച്ച് നടത്തി.
തങ്ങളുടെ ആവശ്യങ്ങള്‍ അംഗീകരിക്കും വരെ സമരവുമായി മുന്നോട്ടു പോകുമെന്നാണ് ഡോക്‌ടര്‍മാരുടെ നിലപാട്. ഒമൈക്രോണ്‍ വ്യാപനത്തിന്റെ പശ്‌ചാത്തലത്തില്‍ ഡോക്‌ടര്‍മാരുടെ സമരം രോഗികളെയും പ്രതിസന്ധിയിൽ ആക്കിയിട്ടുണ്ട്. അഞ്ഞൂറിലധികം ഡോക്‌ടർമാര്‍ സഫ്‌ദര്‍ജങ്ക് ആശുപത്രിക്ക് മുന്നിലെ പ്രതിഷേധത്തില്‍ പങ്കെടുക്കുന്നുണ്ട്. ഒപി അടക്കം ബഹിഷ്‌കരിച്ചാണ് സമരം.
Read Also: കെ-റെയിൽ; സർക്കാരിനെ പരിഹസിച്ച് കെ മുരളീധരൻ എംപി
