മലപ്പുറം: പൊതുജന പങ്കാളിത്തത്തോടെ മാലിന്യ മുക്‌ത പ്രവർത്തനം നടപ്പാക്കി തിരൂരങ്ങാടി നഗരസഭ. മാലിന്യം നിറഞ്ഞ ഇടങ്ങൾ വൃത്തിയാക്കി അവിടങ്ങളിൽ ചെടികൾ വച്ചു പിടിപ്പിച്ച് മനോഹരമാക്കിയാണ് തിരൂരങ്ങാടി നഗരസഭ മാതൃക തീർക്കുന്നത്.
റോഡരികുകളിൽ സ്‌ഥിരമായി മാലിന്യം തള്ളുന്ന ഇടങ്ങൾ കണ്ടെത്തി ശുചീകരിച്ച് സ്‌ഥലത്തിന്റെ സംരക്ഷണ പ്രവർത്തനങ്ങൾ നടത്തുന്നതാണ് ആദ്യ പ്രവർത്തനം. പിന്നീട് മുന്നറിയിപ്പ് ബോർഡുകളും ആരോഗ്യ ബോധവൽക്കരണ സന്ദേശങ്ങളും പരിസരത്ത് സ്‌ഥാപിക്കുന്നു. വീണ്ടും മാലിന്യങ്ങൾ ഇവിടേക്ക് വലിച്ചെറിയപ്പെടുന്നത് തടയാനായി പൂച്ചെടികൾ നട്ടുപിടിപ്പിച്ച് പൂന്തോട്ടവും ഒരുക്കുന്നു.
കണ്ണിന് കുളിർമ പകർന്ന് പൂക്കൾ വിരിഞ്ഞു നിൽക്കുന്ന ഇവിടങ്ങളിൽ മാലിന്യം തള്ളുന്നത് കുറക്കാൻ കഴിയുന്നുണ്ടെന്ന ആശ്വാസത്തിലാണ് നഗരസഭ. പൊതുസ്‌ഥലങ്ങളിൽ മാലിന്യം തള്ളുന്നവർക്കെതിരെ കർശന നടപടികൾ ഉണ്ടാകുമെന്ന് നഗരസഭാ അധികൃതർ മുന്നറിയിപ്പ് നൽകി.
തൃക്കുളം പള്ളിപ്പടി, ചെമ്മാട് തൃക്കുളം ഹൈസ്‌ക്കൂളിന് സമീപം, തിരൂരങ്ങാടി, കക്കാട് തുടങ്ങിയ ഇടങ്ങളിൽ പൂന്തോട്ടങ്ങൾ ഒരുക്കുന്നത് പൂർത്തിയായി. പൊതുകിണറുകൾ ശുചീകരിച്ച് കുടിവെള്ളം ലഭ്യമാക്കുന്ന പ്രവർത്തനങ്ങളും ഇതോടൊപ്പം നടത്തുന്നുണ്ട്. സമ്പൂർണ ആരോഗ്യ ശുചിത്വവും കുടിവെള്ള ലഭ്യതയും നഗരസഭയുടെ ലക്ഷ്യമാണെന്ന് ആരോഗ്യ സ്‌ഥിരം സമിതി അധ്യക്ഷൻ സിപി ഇസ്‌മായിൽ പറഞ്ഞു.
Also Read: യാത്രക്കാരുടെ വിവരങ്ങൾ ശേഖരിക്കാൻ റെയിൽവേ സ്‌റ്റേഷനിൽ കൗണ്ടർ ആരംഭിച്ചു
