ദുബായ്: ഐസിസി ഏകദിന ബാറ്റിംഗ് റാങ്കിംഗിൽ ഒന്നാം സ്‌ഥാനം നിലനിർത്തി പാകിസ്‌ഥാൻ നായകൻ ബാബർ അസം. ഇംഗ്‌ളണ്ടിനെതിരായ അവസാന മൽസരത്തിൽ നേടിയ തകർപ്പൻ സെഞ്ചുറിയാണ് ബാബറിനെ ഒന്നാം സ്‌ഥാനം നിലനിർത്താൻ സഹായിച്ചത്. ആദ്യ രണ്ട് മൽസരങ്ങളിലും ഭേദപ്പെട്ട പ്രകടനം കാഴ്‌ച വയ്‌ക്കാൻ ബാബറിന് കഴിഞ്ഞിരുന്നില്ല. രണ്ടാം നിരയുമായി എത്തിയ ഇംഗ്ളണ്ട് പരമ്പര തൂത്തുവാരുകയും ചെയ്‌തു.
ഏകദിന ബാറ്റിംഗ് റാങ്കിംഗിൽ ഇന്ത്യൻ നായകൻ വിരാട് കോഹ്‌ലി രണ്ടാം സ്‌ഥാനത്തും ഓപ്പണർ രോഹിത് ശർമ മൂന്നാം സ്‌ഥാനത്തും തുടരുകയാണ്. ഐസിസി ഏകദിന, ടെസ്‌റ്റ് റാങ്കിംഗുകളിൽ മറ്റ് പ്രധാന മാറ്റങ്ങളൊന്നുമില്ല. ടി-20 റാങ്കിംഗിൽ ഓസീസിനെതിരായ മികച്ച പ്രകടനത്തോടെ 16 സ്‌ഥാനങ്ങൾ മെച്ചപ്പെടുത്തി വെസ്‌റ്റ് ഇൻഡീസിന്റെ ഫാബിയൻ അലൻ പത്താം സ്‌ഥാനത്തെത്തി. ഈ പട്ടികയിൽ വിരാട് കോഹ്‌ലി അഞ്ചാമതും കെഎൽ രാഹുൽ ആറാമതുമുണ്ട്.
Read Also: കാത്തിരിപ്പിന് വിരാമമാകുന്നു; ‘മാലിക്’ നാളെ മുതൽ ആമസോൺ പ്രൈമിൽ
