ഡല്‍ഹി: രാജ്യത്ത് ജെഇഇ മെയിന്‍ പരീക്ഷകള്‍ക്ക് ഇന്ന് തുടക്കമാവും. കോവിഡ് പശ്ചാത്തലത്തില്‍ പരീക്ഷകള്‍ മാറ്റിവെക്കണമെന്ന വിദ്യാര്‍ത്ഥികളുടെ ആവശ്യം തള്ളിയാണ് ഇന്ന് മുതല്‍ പരീക്ഷകള്‍ ആരംഭിക്കുന്നത്.
മെഡിക്കല്‍ പ്രവേശന പരീക്ഷ (നീറ്റ്) മെയ് മൂന്നിനും ജെ.ഇ.ഇ മെയിന്‍ പരീക്ഷ ഏപ്രില്‍ ആദ്യവാരവും നടത്താനായിരുന്നു ആദ്യം തീരുമാനിച്ചിരുന്നത്. എന്നാല്‍ രാജ്യത്ത് ലോക്ഡൗണ്‍ പ്രഖ്യാപിച്ച സാഹചര്യത്തില്‍ പരീക്ഷകള്‍ മാറ്റിവെക്കുകയായിരുന്നു. ഇതില്‍ ജെ.ഇ.ഇ മെയിന്‍ പരീക്ഷയാണ് ഇന്ന് നടക്കുക. നീറ്റ് പരീക്ഷ ഈ മാസം 13 ന് നടക്കും.
അഡ്മിറ്റ് കാര്‍ഡുകള്‍ അടക്കം എല്ലാം വിതരണം ചെയ്തിട്ടുണ്ടെന്നും യാതൊരുവിധ ആശങ്കക്കും വകയില്ലെന്നും കേന്ദ്ര വിദ്യാഭ്യാസമന്ത്രാലയം അറിയിച്ചു.
കോവിഡ് സാഹചര്യത്തില്‍ പരീക്ഷകള്‍ നടത്തുന്നതിനെതിരെ പ്രതിഷേധവുമായി നിരവധി പേര്‍ രംഗത്തെത്തിയിരുന്നു. പരീക്ഷ മാറ്റിവെക്കണമെന്ന ആവശ്യം രാജ്യത്തിന്റെ പലഭാഗങ്ങളില്‍ നിന്നും ഉയര്‍ന്നിരുന്നു. എന്നാല്‍ ഇവയെല്ലാം തള്ളിയാണ് പരീക്ഷകള്‍ക്ക് ഇന്ന് തുടക്കമാവുന്നത്.
