കാബൂള്‍: അഫ്ഗാനിസ്‌ഥാനില്‍ നടന്ന ഐഇഡി സ്‌ഫോടനത്തില്‍ കാബൂള്‍ ഡെപ്യൂട്ടി ഗവര്‍ണര്‍ മൊഹിബുള്ള മുഹമ്മദിയും സെക്രട്ടറിയും കൊല്ലപ്പെട്ടു. കാബൂളിലെ പിഡി 9 ജില്ലയിലാണ് സംഭവം. ഗവര്‍ണറുടെ വാഹനത്തില്‍ ഐഇഡി സ്‌ഥാപിച്ചിരുന്നതായി കാബൂള്‍ പോലീസ് അറിയിച്ചു.
കാബൂളിലെ ഡെപ്യൂട്ടി ഗവര്‍ണറും സെക്രട്ടറിയും തങ്ങളുടെ വാഹനത്തില്‍ സ്‌ഥാപിച്ച ഐഇഡിയില്‍ നിന്നുണ്ടായ സ്‌ഫോടനത്തില്‍ കൊല്ലപ്പെട്ടതായി ടോളോ ന്യൂസ് ട്വീറ്റ് ചെയ്‌തു. വസ്‌തുത കാബൂള്‍ പോലീസ് സ്ഥിരീകരിച്ചതായും റിപ്പോര്‍ട്ടില്‍ പറയുന്നു. സ്‌ഫോടനത്തില്‍ ഗവര്‍ണറുടെ രണ്ട് അംഗരക്ഷകര്‍ക്കും പരിക്കേറ്റതായാണ് വിവരം.
അതേസമയം സ്‌ഫോടനത്തിന്റെ ഉത്തരവാദിത്തം ഇതുവരെ ഒരു തീവ്രവാദ ഗ്രൂപ്പും ഏറ്റെടുത്തിട്ടില്ല.
സെപ്റ്റംബറില്‍ ഖത്തറില്‍ വെച്ച് താലിബാനുമായി അഫ്ഗാന്‍ സര്‍ക്കാര്‍ നടത്തിയ സമാധാന ചര്‍ച്ചകള്‍ക്ക് ശേഷം രാജ്യത്തുടനീളം ഭീകരമായ അക്രമങ്ങളാണ് തുടരുന്നത്. ഇന്ന് പുലര്‍ച്ചെ കാബൂളില്‍ നടന്ന തീവ്രവാദ ആക്രമണത്തില്‍ ഒരു പോലീസ് ഉദ്യോഗസ്‌ഥന്‍ കൊല്ലപ്പെടുകയും രണ്ട് പേർക്ക് പരിക്കേല്‍ക്കുകയും ചെയ്‌തിരുന്നു.
