തിരുവനന്തപുരം: വ്യാപാരി വ്യവസായി ഏകോപന സമിതി രാഷ്ട്രീയ പാർട്ടി രൂപീകരിക്കുന്നു. കർഷക സംഘടനകളെ ചേർത്താണ് രാഷ്ട്രീയ പാർട്ടി രൂപീകരിക്കുന്നത്. കേരള കർഷക വ്യാപാരി പാർട്ടി എന്നായിരിക്കും പാർട്ടിയുടെ പേര്. വരുന്ന നിയമസഭാ തിരഞ്ഞെടുപ്പിൽ മൽസരിക്കാനാണ് ഇവരുടെ തീരുമാനം.
ഒരു ലക്ഷം പേരെ അണിനിരത്തി ഈ മാസം പാർട്ടി പ്രഖ്യാപിക്കും. പത്തരലക്ഷം അംഗങ്ങളുടെ ഏകോപന സമിതിക്ക് പ്രധാന രാഷ്ട്രീയ പാർട്ടിയായി വളരാൻ സാധിക്കുമെന്നാണ് കണക്കുകൂട്ടൽ. പാർട്ടി പ്രഖ്യാപനത്തിന് മുന്നോടിയായി കർഷക സംഘടനകളുമായി ചർച്ചകൾ പൂർത്തിയാക്കിയിട്ടുണ്ട്.
കൃഷിക്കാരും ചെറുകിട കച്ചവടക്കാരുമാണ് രാജ്യത്തെ മുഴുവൻ നയിക്കുന്ന സാമ്പത്തിക ശേഷിയെന്ന് ഏകോപന സമിതി സംസ്ഥാന പ്രസിഡണ്ട് ടി നസറുദ്ദീൻ പറഞ്ഞു. അവന്റെ കൈ അവന്റെ തലക്കുവെച്ച് ഉറങ്ങണം അതിനാണ് പാർട്ടി ഉണ്ടാക്കിയതെന്നും അദ്ദേഹം കൂട്ടിച്ചേർത്തു. മുന്നണികളോട് നിലവിൽ സമദൂര നയമാണ്. ഇവരുമായി ചർച്ചകൾക്കായുള്ള വാതിൽ അടക്കേണ്ടെന്നാണ് സംഘടനയുടെ നിലവിലെ തീരുമാനം.
Read also: കോഴിക്കോട് മിനി ലോറി അപകടത്തില്പ്പെട്ട് അഞ്ഞൂറോളം കോഴികള് ചത്തു