ന്യൂഡെൽഹി: കേന്ദ്രമന്ത്രി പ്രകാശ് ജാവദേക്കർക്ക് എതിരെ കെകെ രാഗേഷ് എംപി അവകാശ ലംഘന നോട്ടീസ് നൽകി. വയനാട്ടിലെ പരിസ്‌ഥിതി ദുർബല പ്രദേശങ്ങൾ നിർണയിച്ച് വിജ്‌ഞാപനം ഇറക്കിയ വിഷയത്തിൽ രാജ്യസഭയിൽ തെറ്റിദ്ധരിപ്പിക്കുന്ന വിധം മറുപടി നൽകിയെന്ന് ചൂണ്ടിക്കാട്ടിയാണ് നോട്ടീസ് നൽകിയത്.
കരട് വിജ്‌ഞാപനത്തിൽ ഭേദഗതി വരുത്താൻ സംസ്‌ഥാന സർക്കാർ നിർദേശം സമർപ്പിച്ചില്ലെന്നാണ് മന്ത്രി കഴിഞ്ഞദിവസം മറുപടി നൽകിയത്. സംസ്‌ഥാന സർക്കാരിന്റെ നിർദേശപ്രകാരമാണ് കരട് വിജ്‌ഞാപനം ഇറക്കിയതെന്നും മന്ത്രി തെറ്റിദ്ധരിപ്പിച്ചു. വിജ്‌ഞാപനം ഇറങ്ങിയ ശേഷം അതിനെ ശക്‌തമായി എതിർത്ത് മുഖ്യമന്ത്രി കത്തയച്ച കാര്യം കേന്ദ്രമന്ത്രി മറച്ചുവെക്കുകയും ചെയ്‌തു. സംസ്‌ഥാന വനം-വന്യജീവി വകുപ്പ് കൃത്യസമയത്ത് കേന്ദ്ര സർക്കാരിന് ഭേദഗതി നിർദേശം സമർപ്പിച്ചിട്ടുമുണ്ട്.
മന്ത്രിയുടെ മറുപടി തെറ്റിദ്ധാരണ പടർത്തുന്നതും നിജസ്‌ഥിതി അറിയാനുള്ള പാർലമെന്റ് അംഗങ്ങളുടെ അവകാശങ്ങൾ നിഷേധിക്കുന്നതുമാണ്. സംസ്‌ഥാന സർക്കാർ സമർപ്പിച്ച നിർദേശത്തിന്റെ കോപ്പി സഹിതമാണ് കെകെ രാഗേഷ് മന്ത്രിക്ക് എതിരെ അവകാശലംഘന നോട്ടീസ് നൽകിയത്.
Read also: ജനശതാബ്‌ദി പിന്നോട്ടോടി; ജീവൻ പണയം വെച്ച് യാത്രക്കാർ; ലോക്കോ പൈലറ്റിനും ഗാർഡിനും സസ്‌പൻഷൻ
