ലഖ്നൗ: അയോദ്ധ്യയിലെ രാമക്ഷേത്ര ട്രസ്റ്റ് അക്കൗണ്ടിൽ നിന്നും വ്യാജ ചെക്ക് ഉപയോഗിച്ച് വൻ തുക പിൻവലിച്ചതായി റിപ്പോർട്ടുകൾ. ശ്രീ രാമ ജന്മഭൂമി ട്രസ്റ്റിന്റെ പേരിലുള്ള അക്കൗണ്ടിലാണ് തിരിമറി നടന്നത്. രണ്ട് ബാങ്കുകളിലെ അക്കൗണ്ടുകളിൽ നിന്നാണ് പണം പിൻവലിച്ചതെന്ന് സൂചനകളുണ്ട്. അയോദ്ധ്യ പോലീസ് സംഭവത്തിൽ എഫ്.ഐ.ആർ രജിസ്റ്റർ ചെയ്ത് അന്വേഷണം ആരംഭിച്ചു.
മൂന്നാമത്തെ പ്രാവശ്യം പണം പിൻവലിക്കാനുള്ള ശ്രമത്തിൽ ട്രസ്റ്റിന്റെ സെക്രട്ടറിയായ ചമ്പത് റായിക്ക് ബാങ്കിൽ നിന്നും സന്ദേശം ലഭിക്കുകയായിരുന്നു. ട്രസ്റ്റുമായി ബന്ധമുള്ള ആരെങ്കിലുമാണോ തട്ടിപ്പിന് പിന്നിലെന്ന് വ്യക്തമല്ല. അന്വേഷണത്തെ ക്കുറിച്ച് കൂടുതൽ വിവരങ്ങൾ പുറത്തുവിടാൻ പോലീസ് തയ്യാറായില്ല.എത്ര രൂപയാണ് നഷ്ടപ്പെട്ടതെന്ന് ട്രസ്റ്റ് ഇതുവരെയും അറിയിച്ചിട്ടില്ല. 6 ലക്ഷം രൂപയോളം രണ്ട് തവണയായി പ്രതി പിൻവലിച്ചുവെന്നാണ് സൂചനകൾ.