കൊച്ചി: ലൈഫ് മിഷന്‍ കോഴ ഇടപാടുമായി ബന്ധപ്പെട്ട് യൂണിടെക്ക് എംഡി സന്തോഷ് ഈപ്പന്‍ അടക്കമുള്ളവരെ സിബിഐ ഇന്ന് വീണ്ടും ചോദ്യം ചെയ്യും. ലൈഫ് മിഷന്‍ സിഇഒ, യു വി ജോസിനോട് ഇടപാടുമായി ബന്ധപ്പെട്ട ഫയലുകളുമായി ഹാജരാകാനും സിബിഐ നോട്ടീസ് നല്‍കിയിട്ടുണ്ട്.
ലൈഫ് മിഷന്‍ പദ്ധതി നടത്തിപ്പുമായി ബന്ധപ്പെട്ട് കോഴ നല്‍കിയതായി വെളിപ്പെടുത്തിയ സന്തോഷ് ഈപ്പനെ നേരത്തെ അന്വേഷണ സംഘം ചോദ്യം ചെയ്‌തിരുന്നു.
Read Also: മന്ത്രിസഭ യോഗം ഇന്ന് ചേരും
അതേസമയം യൂണിടെക്കുമായുള്ള കരാര്‍ ആരുടെ നിര്‍ദ്ദേശം അനുസരിച്ചാണ്‌ എന്നതിലും വിദേശ ഫണ്ട് ഉപയോഗിച്ച് നിര്‍മാണം നടത്തുമ്പോള്‍ എന്തുകൊണ്ട് കേന്ദ്ര അനുമതി വാങ്ങിയില്ല എന്നതിലും യു വി ജോസില്‍ നിന്ന് സിബിഐ വ്യക്തത തേടും.
കൂടാതെ സ്വര്‍ണക്കടത്തു കേസിലെ പ്രതികള്‍ ആയ കെ ടി റമീസ്, ജലാല്‍ എന്നിവരെ കള്ളപ്പണ ഇടപാടുകളുമായി ബന്ധപ്പെട്ട് എന്‍ഫോഴ്‌സമെന്റ് ഡയറക്ടറേറ്റ് ഇന്ന് ചോദ്യം ചെയ്യും. വിയ്യൂര്‍ ജയിലില്‍ എത്തിയാണ് ഇ. ഡി. ഇവരെ ചോദ്യം ചെയ്യുക.
