മലപ്പുറം: കൊണ്ടോട്ടിയിൽ ബസ് നിയന്ത്രണം തെറ്റി മറിഞ്ഞ് നിരവധിപ്പേർക്ക് പരിക്കേറ്റ സംഭവത്തിൽ കെഎസ്ആർടിസി അന്വേഷണം ആരംഭിച്ചു. മലപ്പുറം കൊണ്ടോട്ടിയിൽ ബസുകളുടെ മൽസര ഓട്ടത്തിനിടെ ആയിരുന്നു അപകടം. 18 പേർക്കാണ് അപകടത്തിൽ പരിക്കേറ്റത്. സ്വകാര്യ ബസിനെ മറികടക്കുന്നതിനിടെ ആയിരുന്നു ഇന്ന് രാവിലെ അപകടം നടന്നത്.
രാവിലെ കൊണ്ടോട്ടി ബസ് സ്റ്റാൻഡിന് സമീപമാണ് അപകടം ഉണ്ടായത്. കോഴിക്കോട്-പാലക്കാട് റൂട്ടിലെ കെഎസ്ആർടിസി ബസാണ് അപകടത്തിൽപ്പെട്ടത്. ഇതേ റൂട്ടിലെ സ്വകാര്യ ബസിനെ കറികടക്കാനുള്ള ശ്രമത്തിനിടെ ആയിരുന്നു അപകടം. വലതുവശം ചേർന്ന് പോവുകയായിരുന്ന ബസിനെ ഓവർടേക്ക് ചെയ്യാനുള്ള ശ്രമത്തിനിടെ കെഎസ്ആർടിസി ബസ് ഡിവൈഡറിൽ കയറി. ബസ് വളക്കാനുള്ള ശ്രമത്തിനിടെ മറിയുകയായിരുന്നു.
രാവിലെ റോഡിൽ തിരക്ക് കുറവായതിനാൽ വലിയ ദുരന്തമാണ് ഒഴിവായത്. പരിക്കേറ്റ യാത്രക്കാരെ ആശുപത്രിയിൽ പ്രവേശിപ്പിച്ചു. ഈ പാതയിൽ ബസുകളുടെ മൽസരയോട്ടവും അപകടവും പതിവാണെന്ന് നാട്ടുകാർ പറയുന്നു. അപകടത്തെ തുടർന്ന് രാവിലെ കോഴിക്കോട്-പാലക്കാട് പാതയിൽ ഗതാഗതക്കുരുക്ക് അനുഭവപ്പെട്ടിരുന്നു.
Most Read| രാജ്യസഭാ സീറ്റ് ലീഗ് അംഗീകരിക്കുമോ? അന്തിമതീരുമാനം ചൊവ്വാഴ്ച