തിരുവനന്തപുരം: സംസ്ഥാനത്തെ കോളേജുകളും രോഗവ്യാപനം ഉയരുന്ന സാഹചര്യത്തിൽ അടച്ചിടുന്നത് പരിഗണനയിൽ. എന്നാൽ കോളേജുകൾ അടക്കുന്നത് സംബന്ധിച്ച അന്തിമ തീരുമാനം മറ്റന്നാൾ നടക്കുന്ന അവലോകന യോഗത്തിലായിരിക്കും എടുക്കുക. നിലവിൽ യോഗത്തിന്റെ അജൻഡയിൽ കോളേജുകൾ അടക്കുന്നത് കൂടി ഉൾപ്പെടുത്തിയിട്ടുണ്ട്.
സംസ്ഥാനത്ത് വിദ്യാഭ്യാസ സ്ഥാപനങ്ങളിൽ അടക്കം നൂറിലേറെ ക്ളസ്റ്ററുകൾ ഇപ്പോൾ രൂപപ്പെട്ടിട്ടുണ്ട്. അതിനാൽ തന്നെ പൊതു സ്ഥലങ്ങളിൽ കടുത്ത നിയന്ത്രണങ്ങൾ ഏർപ്പെടുത്തിയേക്കും. കൂടാതെ രാത്രി കർഫ്യൂ അടക്കമുള്ള നിയന്ത്രണങ്ങളും പരിഗണനയിലുണ്ട്. ക്ളസ്റ്ററുകൾ രൂപപ്പെട്ടതിനെ തുടർന്നും, രോഗവ്യാപനം ക്രമാതീതമായി ഉയർന്നതിനെ തുടർന്നും തിരുവനന്തപുരത്തെ ചില കോളേജുകൾ ഇതിനോടകം അടച്ചു കഴിഞ്ഞു.
അതേസമയം വെള്ളിയാഴ്ച മുതൽ സംസ്ഥാനത്ത് 10,11,12 ക്ളാസുകൾ ഒഴികെയുള്ളവക്ക് ഓഫ്ലൈൻ ക്ളാസുകൾ നിർത്തിവെക്കാൻ തീരുമാനിച്ചിരുന്നു. നിലവിൽ സ്കൂളുകളും കോളേജുകളും കോവിഡ് ക്ളസ്റ്ററുകൾ ആകുന്ന സാഹചര്യത്തിൽ ഓഫ്ലൈൻ ക്ളാസുകൾ പൂർണമായും ഒഴിവാക്കാനുള്ള സാധ്യതയുമുണ്ട്. മറ്റന്നാൾ വൈകുന്നേരം 5 മണിക്കാണ് സംസ്ഥാനത്ത് കോവിഡ് അവലോകന യോഗം നടക്കുക. അമേരിക്കയിൽ ചികിൽസയിൽ കഴിയുന്ന മുഖ്യമന്ത്രി ഓൺലൈനായി യോഗത്തിൽ പങ്കെടുക്കും.
Read also: ബ്രഹ്മപുരം മാലിന്യ പ്ളാന്റില് തീപിടുത്തം; ആളപായമില്ല