കോട്ടയം: പാമ്പ് കടിയേറ്റതിനെ തുടർന്ന് കോട്ടയം മെഡിക്കൽ കോളേജിൽ ചികിൽസയിൽ കഴിയുന്ന വാവ സുരേഷിന്റെ ആരോഗ്യനില തൃപ്‌തികരമാണെന്ന് വ്യക്‌തമാക്കി ഡോക്‌ടർമാർ. കൂടാതെ അടുത്ത 48 മണിക്കൂർ നിർണായകമാണെന്നും, വെന്റിലേറ്റർ സഹായം തുടരുകയാണെന്നും കൂട്ടിച്ചേർത്തു. വെന്റിലേറ്റർ സഹായം ഒരാഴ്‌ച കൂടി വേണ്ടി വന്നേക്കാമെന്നും ആശുപത്രി അധികൃതർ വ്യക്‌തമാക്കി.
ആന്റിവെനം ചികിൽസ ഇപ്പോഴും തുടരുന്നുണ്ട്. ഹൃദയസ്‌തംഭനം മൂലം തലച്ചോറിന് ആഘാതം ഉണ്ടായോ എന്ന് പരിശോധിക്കണം. ഇന്നലെ വൈകുന്നേരവും, ഇന്ന് രാവിലെയും ആരോഗ്യനില അൽപം ഗുരുതരമായെങ്കിലും, ഇന്ന് ഉച്ചയോടെ വീണ്ടും ആരോഗ്യനിലയിൽ പുരോഗതി ഉണ്ടായതായി ഡോക്‌ടർമാർ അറിയിച്ചു. ഇന്നലെയോടെ ശരീരം മരുന്നുകളോട് പ്രതികരിക്കുകയും, ഡോക്‌ടർമാരുടെ നിർദ്ദേശപ്രകാരം കൈകാലുകൾ ചലിപ്പിക്കുകയും ചെയ്‌തിരുന്നു. എന്നാൽ പിന്നീട് കാര്യമായ പുരോഗതി ഉണ്ടാകാഞ്ഞതാണ് ആശങ്കയ്‌ക്ക്‌ വഴിവച്ചത്.
തിങ്കളാഴ്‌ച വൈകുന്നേരത്തോടെതാണ് കോട്ടയത്തെ കുറിച്ചിയിൽ വച്ച് വാവ സുരേഷിന് മൂർഖൻ പാമ്പിന്റെ കടിയേറ്റത്. തുടർന്ന് സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ആരോഗ്യനില മോശമായതിനെ തുടർന്ന് കോട്ടയം മെഡിക്കൽ കോളേജിൽ പ്രവേശിപ്പിക്കുകയായിരുന്നു.
Read also: മധു കൊലക്കേസിൽ വിചാരണ വൈകുന്നു; ഇടപെട്ട് ഹൈക്കോടതി
