ന്യൂയോര്‍ക്ക്: അമേരിക്കന്‍ തിരഞ്ഞെടുപ്പില്‍ ഡെമോക്രാറ്റിക് പാര്‍ട്ടിയുടെ വൈസ് പ്രസിഡണ്ട് സ്‌ഥാനാര്‍ത്ഥിയായ കമല ഹാരിസിന് പിറന്നാളാശംസിച്ച് പ്രസിഡണ്ട് സ്‌ഥാനാര്‍ത്ഥി ജോ ബൈഡന്‍. അടുത്ത പിറന്നാള്‍ വൈറ്റ് ഹൗസില്‍ വെച്ച് ആഘോഷിക്കാം എന്നാണ് ബൈഡന്റെ ആശംസ. ‘ഹാപ്പി ബര്‍ത്ത് ഡേ കമല ഹാരിസ്, അടുത്ത വര്‍ഷം കുറച്ചു ഐസ്‌ക്രീമുകളുമായി നമുക്ക് വൈറ്റ് ഹൗസില്‍ പിറന്നാള്‍ ആഘോഷിക്കാം,’ ബൈഡന്‍ ട്വീറ്റ് ചെയ്‌തു.
Happy Birthday, @KamalaHarris. Next year, let’s celebrate with some ice cream at the White House. pic.twitter.com/SWhS32AaIE
— Joe Biden (@JoeBiden) October 20, 2020
ചൊവ്വാഴ്‌ചയായിരുന്നു കമല ഹാരിസിന്റെ 56ആം പിറന്നാള്‍. ‘ഇത്തവണത്തെ എന്റെ പിറന്നാള്‍ ആഗ്രഹം എല്ലാവരും വോട്ട് ചെയ്യണം’ എന്നാണ് കമലയുടെ ട്വീറ്റ്. ജോ ബൈഡനെക്കൂടാതെ ഹിലരി ക്‌ളിന്റണും കമല ഹാരിസിന് ആശംസകളറിയിച്ചു. രണ്ടാഴ്‌ചക്കുള്ളില്‍ ഈ ബര്‍ത്ത് ഡേ ഗേളിനെ നമ്മള്‍ മാഡം വൈസ് പ്രസിഡണ്ട് എന്നു വിളിക്കുമെന്നാണ് ഹിലരി ക്‌ളിന്റണിന്റെ ട്വീറ്റ്.
ആഗസ്‌റ്റിലാണ് കമല ഹാരിസ് വൈസ് പ്രസിഡണ്ട് സ്‌ഥാനാര്‍ത്ഥിയായി നോമിനേറ്റ് ചെയ്യപ്പെട്ടത്. തെരഞ്ഞെടുപ്പില്‍ വിജയിച്ചാല്‍ അമേരിക്കന്‍ വൈസ് പ്രസിഡണ്ടാവുന്ന ആദ്യ വനിത, ഏഷ്യന്‍ വംശജ എന്നീ നേട്ടങ്ങളും കമലാ ഹാരിസിന് സ്വന്തമാവും. നവംബര്‍ മൂന്നിനാണ് തെരഞ്ഞെടുപ്പ് നടക്കുന്നത്.
Read also: ഇനി പറക്കാം വിസയില്ലാതെ; കരാറുകളില്‍ ഒപ്പുവെച്ച് ഇസ്രയേലും യുഎഇയും
