തിരുവനന്തപുരം: രാജ്യത്തെ നടുക്കിയ ഡൽഹിയിലെ നിർഭയ കേസിനെ ആസ്പദമാക്കി പ്രശസ്ത കീബോർഡ് ആർട്ടിസ്റ്റ് സ്റ്റീഫൻ ദേവസ്സി സംഗീത സംവിധാനം ചെയ്യുന്ന ‘ നിർഭയ ‘ മ്യൂസിക് ആൽബം ഉടൻ പുറത്തിറങ്ങും. സിധിനാണ് ആൽബം സംവിധാനം ചെയ്തിരിക്കുന്നത്. 2012ൽ നടന്ന സംഭവത്തിലെ നിർഭയ എന്ന പെൺകുട്ടിക്ക് ആദരമായാണ് ഈ സംഗീത ആൽബം പുറത്തിറക്കുന്നത്.
ജഗതി ശ്രീകുമാർ എന്റർടൈൻമെന്റ്സിന്റെ ബാനറിൽ രാജ് കുമാർ, സായി സുധ തരൂർ, സതീഷ് കുമാർ എന്നിവർ ചേർന്നാണ് ആൽബം നിർമ്മിക്കുന്നത്. പ്രശസ്ത ചിത്രസംയോജകനായ ശ്രീകർ പ്രസാദാണ് എഡിറ്റിംഗ് നിർവഹിച്ചിരിക്കുന്നത്.
ജഗതി ശ്രീകുമാറിന്റെ മകനായ രാജ് കുമാറാണ് ഫേസ്ബുക്കിലൂടെ ഇക്കാര്യം പുറത്തുവിട്ടത്. ഇദ്ദേഹവും ‘നിർഭയ’യിൽ ഒരു പ്രധാന വേഷത്തിൽ എത്തുന്നുണ്ട്. ബിനയചന്ദ്ര മേനോനാണ് ഛായാഗ്രഹണം. ആൽബത്തിനൊപ്പം മറ്റൊരു സർപ്രൈസ് കൂടി പുറത്തുവിടുമെന്ന് അണിയറപ്രവർത്തകർ വ്യക്തമാക്കിയിരുന്നു.